काठमाडौं ।महिन्द्राले आफ्नो लोकप्रिय अफ–रोडर थार २०२५ लाई भारतीय बजारमा लन्च गरेको छ। कम्पनीले यसपटक ३ डोर भर्सनमा आधुनिक फिचरको साथ सो नयाँ फेसलिफ्ट प्रस्तुत गरेको हो । अफरोड प्रेमीका लागि सो नयाँ संस्करण अझ आकर्षक र सुरक्षित बनेको छ ।

नयाँ थारमा पहिलोपटक बडी कलर्ड रेडिएटर ग्रिल दिइएको छ, जसले गाडीको लुकलाई अझ प्रिमियम बनाएको छ । यो ग्रिल अब सिधै बडी शेलसँग मिल्ने रङमा फिनिस गरिएको छ, जसले यसलाई पुरानो संस्करणको तुलनामा ताजा र आधुनिक रूप प्रदान गर्छ।

सेफ्टीका दृष्टिले पनि महिन्द्राले नयाँ सुधार ल्याएको छ । अब थार २०२५ पछाडिको पार्किङ क्यामेरासहित आउनेछ, जसले पार्किङलाई सहज र सुरक्षित बनाउँछ। यद्यपि, यसपटक पनि कम्पनीले एलईडी हेडल्याम्प समावेश गरेको छैन। साथै स्पष्ट दृश्यता कायम गर्नका लागि पछाडिको विन्डस्क्रिनमा धुने र वाइपर सुविधा थप गरिएको छ।

यात्रामा आराम र सजिलो बनाउन पिलरमा नयाँ ग्र्याब ह्यान्डलहरू जडान गरिएको छ, जसले सवारीमा चढ्ने र ओर्लिन सजिलो बनाउँछ, विशेष गरी पछाडिको सिट प्रयोग गर्ने यात्रुका लागि । नयाँ थार २०२५ मा अर्को सानो तर महत्वपूर्ण परिवर्तन भनेको पावर विन्डो कन्ट्रोलको स्थान परिवर्तन हो । पहिले सेन्टर कन्सोलमा रहेका यी स्विच अब डाेर प्यानलमा स्थानान्तरण गरिएको छ ।