काठमाडौँ। हालै सम्पन्न जेनजी आन्दोलनका क्रममा जलेका सवारी साधन पुनः व्यवस्थापन गर्न नेपाल प्रहरीले नयाँ गाडी खरिद गर्ने भएको छ। यसका लागि अर्थ मन्त्रालयले पहिलो चरणमा २५१ वटा सवारीसाधन खरिदको सहमति प्रदान गरेको मन्त्रालय स्रोतले जनाएको छ।

मन्त्रालयको सहमतिअनुसार, नेपाल प्रहरीलाई १७५ वटा, सशस्त्र प्रहरीलाई ७० वटा र राष्ट्रिय अनुसन्धान विभागलाई ६ वटा गाडी खरिद गर्न अनुमति दिइएको हो।

अर्थ मन्त्रालयका एक सहसचिवका अनुसार, आइतबार प्रहरीलाई गाडी खरिदको लागि औपचारिक सहमति प्रदान गरिएको हो।

आगामी निर्वाचनको मिति घोषणा भइसकेको सन्दर्भमा सुरक्षा व्यवस्थालाई सुदृढ बनाउने उद्देश्यले प्रहरी संगठनसँग पर्याप्त सवारीसाधन नहुँदा यो निर्णय गरिएको जनाइएको छ।

निर्वाचन आयोगले पनि आवश्यक सुरक्षाका उपकरण र सवारीसाधन छिटो उपलब्ध गराउन सरकारसँग आग्रह गर्दै आएको थियो। यसै क्रममा, प्रहरीले ‘विशेष परिस्थिति’ भन्दै सवारीसाधन खरिद प्रक्रिया अघि बढाएको हो।