काठमाडौं। ग्रेटवाल मोटर (GWM) ले आफ्नो नयाँ इलेक्ट्रिक कार ओरा५ को प्री–सेल सुरु गरेको छ। कम्पनीले सुरुवाती मूल्य १५,४०० अमेरिकी डलर कायम गरी चिनियाँ बजारमा बुकिङ लिन थालेको हो।

ओरा५ ६ वटा कलर अप्सनमा उपलब्ध हुनेछ र ४८० र ५८० किलोमिटरको रेन्ज विकल्पसहित ५ वटा ट्रिममा उपलब्ध हुनेछ। उच्च ट्रिममा उन्नत ड्राइभिङ एसिस्टेन्स सिस्टमको लागि अत्याधुनिक लिडार पनि उपलब्ध गराइएको छ।

रेट्रो शैलीमा डिजाइन गरिएको ओरा५ को लम्बाई ४,४७१ मिमी, चौडाई १,८३३ मिमी, उचाई १,६४१ मिमी र ह्विलबेस २,७२० मिमी रहेको छ। यसमा १५० किलोवाट क्षमताको मोटर जडान गरिएको छ भने ब्याट्री प्याक ४५.३ र ५८.३ किलोवाट–घण्टा अप्सनमा उपलब्ध हुनेछ।

ओरा५ को इन्टेरियरमा १०.२५ इन्चको डिजिटल इन्स्ट्रुमेन्ट क्लस्टर र १५.६ इन्चको २.५के फ्लोटिङ सेन्ट्रल कन्ट्रोल स्क्रिन रहेको मिनिमलिस्टिक डिजाइन छ। यसमा दुई–स्पोक फ्ल्याट–बटम स्टेयरिङ ह्वील र GWM को तेस्रो–पुस्ताको Koffee OS अपरेटिङ सिस्टम प्रयोग गरिएको छ।

चिनियाँ बजारमा छिट्टै लन्च हुने तयारीमा रहेको ओरा५ निकट भविष्यमा नेपाली बजारमा पनि उपलब्ध हुने अनुमान गरिएको छ। नेपालमा ग्रेटवाल मोटर्सका सवारीसाधन भीजी इम्पेक्स प्रालिले बिक्री गर्दै आएको छ। कम्पनी हाल यसको ओरा०३ इलेक्ट्रिक कार पनि उपलब्ध गराइरहेको छ।