काठमाडौं। एनएमबि बैंकले नेपाल क्लियरिङ हाउस लिमिटेड (NCHL) सँगको सहकार्यमा डिजिटल कारोबारलाई थप सुरक्षित तथा सहज बनाउन कार्डमा आधारित नयाँ अनलाइन पेमेन्ट गेटवे सञ्चालनमा ल्याएको छ। बैंकले यसको माध्यमबाट देशभरका भौतिक तथा अनलाइन ई–कमर्स व्यवसायीहरूलाई एकीकृत तथा सुरक्षित भुक्तानी सेवा उपलब्ध हुने बताएको छ।

नयाँ गेटवे प्रयोग गरी व्यवसायीहरूले स्वदेशी तथा विदेशी बैंकहरूले जारी गरेका सबै प्रकारका कार्डबाट भुक्तानी स्वीकार गर्न सक्नेछन्। नेपालमै होइन, विदेशबाट पनि भुक्तानी स्वीकार गर्न सकिने भएकाले व्यवसाय विस्तारमा महत्वपूर्ण मद्दत पुग्ने बैंकको दाबी छ।

पेमेन्ट गेटवेमा अत्याधुनिक सुरक्षा प्रविधि समावेश गरिएको बैंकले जनाएको छ। यसमा कारोबार प्रमाणीकरणका लागि वन–टाइम पासवर्ड (OTP) वा पासवर्ड अनिवार्य रहने व्यवस्था गरिएको छ, जसले अनधिकृत कारोबारको जोखिम न्यून गराउँदै समग्र सुरक्षा स्तर बढाउने अपेक्षा गरिएको छ।

एनएमबि बैंकका अनुसार, यो साझेदारीले देशमा ई–कमर्स विकास र डिजिटल वित्तीय प्रणालीलाई थप गति दिनेछ। अनलाइन व्यवसायीहरूले आफ्नो पोर्टलमा उक्त गेटवे जडान गरी सुरक्षित कार्ड भुक्तानी सुविधा दिन एनएमबि बैंकसँग सम्पर्क गर्न सक्नेछन्।

हाल एनएमबि बैंकले देशभर २०२ शाखा, १८४ एटिएम तथा ९ एक्सटेन्सन काउन्टर मार्फत सेवा प्रदान गर्दै आएको छ।