काठमाडौँ । नेपाल प्रहरी प्रधान कार्यालय केन्द्रीय अनुसन्धान ब्यूरो (CIB) लाजिम्पाटले मंसिर १४ गते सार्वजनिक गरेको विवरणपछि प्रभु बैंक लिमिटेडले आफ्नो दैनिक कामकाज प्रभावित नहोस् भन्ने उद्देश्यले कार्यकारी नेतृत्वमा समायोजन गरेको छ।

CIB को अनुसन्धान प्रक्रियामा बैंकका प्रमुख कार्यकारी अधिकृतसहित तीन जना कर्मचारी परेपछि, बैंकको सञ्चालक समितिले वरिष्ठतम् कर्मचारी निरज लम्साललाई मंसिर १४ गतेदेखि लागू हुने गरी कार्यवाहक प्रमुख कार्यकारी अधिकृत (CEO) को जिम्मेवारी प्रदान गरेको बैंकले जारी गरेको विज्ञप्तिमा उल्लेख छ।

बैंकका अनुसार देशभरका शाखा सञ्जालमार्फत प्रदान हुँदै आएका वित्तीय सेवा–सुविधा निर्वाध, नियमित तथा प्रभावकारी रूपमा जारी छन् र ग्राहकलाई कुनै प्रकारको असुविधा नपरोस् भनेर आवश्यक व्यवस्था मिलाइएको छ।

यस्तै, अनुसन्धान प्रक्रियाले बैंकको दैनिक कार्य सञ्चालन, वित्तीय सुशासन, निक्षेपकर्ता, शेयरधनी तथा ग्राहकको हितमा कुनै नकारात्मक प्रभाव नपर्ने दाबी बैंकले गरेको छ।

बैंकले आफ्ना ग्राहक, निक्षेपकर्ता तथा शेयरधनीप्रति निरन्तर सहयोग, सद्भाव र विश्वासका लागि आभार व्यक्त गर्दै, भविष्यमा पनि सेवाको निरन्तरता र स्थायित्व कायम रहिरहने विश्वास व्यक्त गरेको छ।