काठमाडौं । मनाङमा निर्माण हुन लागेको ६१.११ मेगावाट क्षमताको नार खोला जलविद्युत आयोजनाका लागि कुमारी बैंकको अगुवाइमा पाँच वटा बैंकहरूले संयुक्त रूपमा वित्तीय लगानी गर्ने भएको छ। सोमबार आयोजित कार्यक्रममा नार खोला हाइड्रो इनर्जी प्रा.लि.का अध्यक्ष बटु लामिछाने र कुमारी बैंकका प्रमुख क्षेत्रीय कर्जा अधिकृत अर्पण पोखरेलले ऋण लगानी सम्झौतापत्रमा संयुक्त रूपमा हस्ताक्षर गर्दै वित्तीय व्यवस्थापन टुंगाएका हुन्।

नार्पा भूमि र नासोँ गाउँपालिकास्थित नार खोला तथा सोती खोलाको पानी समायोजन गरी ६१.११ मेगावाटको आयोजनाको निर्माण प्रक्रिया अघि बढाइएको छ। प्रवद्र्धक कम्पनी  नार खोला हाइड्रो इनर्जी प्रा.लि.का अनुसार आयोजना निर्माणका सबै प्रक्रिया पूरा भइसकेका छन्। नेपाल विद्युत प्राधिकरणसँग विद्युत खरिद सम्झौता (PPA) यसअघि नै सम्पन्न भइसकेको छ।

कुमारी बैंकको अगुवाइ तथा नेपाल एसबिआई बैंकको सह–अगुवाइमा कृषि विकास बैंक, एनआईसी एशिया बैंक र मुक्तिनाथ विकास बैंक सदस्य बैंकका रूपमा सहभागी हुँदै आयोजनामा लगानी गर्ने वित्तीय संरचना तय गरिएको छ।

आयोजनाको ग्रेस हेड ५८८.८२ मिटर रहने र वार्षिक ३६६.४८ गिगावाटघण्टा विद्युत उत्पादन हुने अनुमान छ। करिब ८ किलोमिटर लम्बाइको हेडरेस टनेलमार्फत पानी पेनस्टक पाइप प्रयोग गरी नासोँ गाउँपालिकास्थित पावरहाउसमा पुर्‍याई विद्युत उत्पादन गरिनेछ। उत्पादन भएको विद्युत मनाङमै निर्माणाधीन धारापानी सबस्टेशनमा जोडिनेछ।

करिब १२ अर्ब ८४ करोड लागत अनुमान गरिएको परियोजनामा ९ अर्ब ६३ करोड बैंक कर्जा र ३ अर्ब २१ करोड स्वपूँजी रहनेछ। यसमध्ये सिंगटी हाईड्रो इनर्जी लिमिटेडको प्रमुख लगानी रहने आयोजित कम्पनीले जनाएको छ।