काठमाडौं । नेपाल धितोपत्र बोर्ड (सेबोन)ले कामना सेवा विकास बैंकलाई ९ प्रतिशत लाभांशदर तोकिएको रु. १०० अंकित ३५ लाख कित्ता अविमोच्य असञ्चिती अग्राधिकार शेयर जारी गर्न अनुमति प्रदान गरेको छ। बैंकको १८औँ वार्षिक साधारणसभाबाट अग्राधिकार शेयर जारी गर्ने प्रस्ताव पारित भई नेपाल राष्ट्र बैंकको स्वीकृति लिएको थियो। सोही प्रस्ताव धितोपत्र बोर्डमा पेस गरेपछि सेबोनले औपचारिक स्वीकृति प्रदान गरेको हो।

अग्राधिकार शेयर जारी भएपछि बैंकको पूँजीगत संरचना थप सुदृढ हुने, पुँजीकोष थप मजबुत हुने र व्यवसाय विस्तारको दायरा बढ्ने बैंकले जनाएको छ। हालको बजार तरलता अवस्था तथा प्रतिफल दरलाई दृष्टिगत गर्दा ९ प्रतिशत लाभांश प्रदान गर्ने यो अग्राधिकार शेयर संस्थागत लगानीकर्ताहरूका लागि आकर्षक लगानी अवसर बन्न सक्ने बैंकको विश्वास छ।

नेपाल राष्ट्र बैंकले बैंक तथा वित्तीय संस्थाहरूको पुँजीकोष सुदृढ बनाउन हकप्रद शेयरका विकल्पका रूपमा अविमोच्य असञ्चिती अग्राधिकार शेयर जारी गर्ने व्यवस्था सर्कुलरमार्फत खुला गरेको थियो। सोही नीति अनुसार कामना सेवा विकास बैंकले अग्राधिकार शेयर निष्कासन प्रक्रिया अघि बढाएको हो।