काठमाडौं। सांग्रिला डेभलपमेन्ट बैंकले इलामका बाढी–पहिरो प्रभावित नागरिकका लागि न्यानो कपडा हस्तान्तरण गरेको छ। मंसिर १५ गते आयोजित बेग्लाबेग्लै कार्यक्रममार्फत सूर्योदय नगरपालिका र इलाम नगरपालिका का बाढी–पहिरो प्रभावित परिवारलाई न्यानो कपडा प्रदान गरिएको हो।

सूर्योदय नगरपालिकाका मेयर रणबहादुर राई तथा इलाम नगरपालिकाका मेयर केदार थापा लाई बैंकको तर्फबाट न्यानो कपडा हस्तान्तरण गरिएको हो। दुबै कार्यक्रमका क्रममा न्यानो कपडा सांग्रिला डेभलपमेन्ट बैंकका मार्केटिङ विभाग प्रमुख अर्पणा बज्राचार्य ले हस्तान्तरण गरिन्।

बैंकका अनुसार सूर्योदय नगरपालिकाका विपद्ग्रस्त परिवारका लागि ३५० वटा नयाँ ज्याकेट र दाताहरूबाट संकलित सात बोरा न्यानो कपडा तथा इलाम नगरपालिकाका प्रभावितका लागि १७५ वटा नयाँ ज्याकेट र दाताहरूबाट संकलित पाँच बोरा न्यानो कपडा प्रदान गरिएको छ।

बैंकले आफ्नो स्थापना दिवसको अवसरमा इलामका बाढी–पहिरो प्रभावितलाई न्यानो कपडा वितरण गर्ने घोषणा अनुसार राहत सामग्री वितरण गरिएको हो।

१ सय ९ शाखा र ३० एटीएममार्फत सेवा प्रदान गर्दै आएको सांग्रिला डेभलपमेन्ट बैंकले संस्थागत सुशासन, जोखिम व्यवस्थापन र आन्तरिक नियन्त्रण प्रणालीलाई मजबुत बनाउँदै आगामी दिनमा सेवाको दायरा थप विस्तार गर्ने प्रतिबद्धता जनाएको छ।