काठमाडौं। नेपाल एसबिआई बैंक लिमिटेडले आफ्नो सामाजिक उत्तरदायित्व (CSR) कार्यक्रमअन्तर्गत विराटनगर–कोचाखालस्थित विराट बहिरा माध्यमिक विद्यालयमा डिप बोरिङ जडानका लागि रु. २ लाख ५० हजार आर्थिक सहयोग प्रदान गरेको छ।

बैंकका अनुसार यस सहयोगमार्फत विद्यालयका विद्यार्थी, शिक्षक र कर्मचारीहरूलाई स्वच्छ तथा सहज खानेपानी सुविधा उपलब्ध गराउने लक्ष्य राखिएको छ।

एक कार्यक्रमका बीच बैंकका प्रबन्ध सञ्चालक तथा प्रमुख कार्यकारी अधिकृत राम कुमार तिवारीले विद्यालय व्यवस्थापन समितिकी अध्यक्ष मिना जोशी र प्रधानाध्यापक मिनु अधिकारी दाहाललाई संयुक्त रूपमा सहयोग रकमको चेक हस्तान्तरण गरे।

कार्यक्रममा बैंकका नायब प्रमुख कार्यकारी अधिकृत तथा प्रमुख सञ्चालन अधिकृत विकास आनन्द, प्रमुख वित्तीय अधिकृत राजेश कुमार पण्डा, प्रमुख अनुपालन अधिकृत विष्णुदेव यादव, प्रमुख व्यवसाय प्रवर्द्धन अधिकृत प्रविण मुनि बज्राचार्य, प्रमुख कर्जा अधिकृत रोशन कोइराला, कोशी प्रदेश प्रमुख श्रीधर अधिकारी, साथै बैंक तथा विद्यालयका अन्य पदाधिकारीहरूको उपस्थिति रहेको थियो।

बैंकले शिक्षा क्षेत्रप्रति जिम्मेवारी स्वरूप यस्ता सामाजिक कार्यक्रमहरू समय–समयमा आयोजना गर्दै आएको जनाएको छ।

नेपाल एसबिआई बैंक लिमिटेडले बिगत ३२ वर्षदेखि बैंकिङ सेवा प्रदान गर्दै आएको छ। हाल बैंकका १०२ शाखा, २२ एक्स्टेन्सन काउन्टर, २१ शाखारहित बैंकिङ इकाइ, ७ प्रादेशिक कार्यालय, १२७ एटिएम तथा १ कर्पोरेट कार्यालय सञ्चालनमा छन्।