काठमाडौं। वातावरण संरक्षण, सामुदायिक कल्याण र दिगोपनलाई संस्थागत प्राथमिकता बनाउँदै सन नेपाल लाइफ इन्स्योरेन्स कम्पनी लिमिटेडले आफ्नो देशव्यापी वृक्षारोपण अभियानको दोस्रो चरण इलाम नगरपालिकामा सम्पन्न गरेको छ।

अभियानअन्तर्गत आज ५०० आरू र ५०० नासपाती गरी १,००० फलफूलका बिरुवा रोपेर इलाममा हरियाली अभियानलाई औपचारिक रूपमा अघि बढाइएको कम्पनीले जनाएको छ।

कार्यक्रममा कम्पनीका प्रमुख कार्यकारी अधिकृत राजकुमार अर्याल, नायब प्रमुख कार्यकारी अधिकृत कबी फुयाँल, प्रमुख बजार अधिकृत गणेश चौलागाई, कोशी प्रदेश प्रमुख तुलसीनाथ पौडेल, तथा प्रदेशका विभिन्न शाखा प्रमुखहरूको उपस्थिति थियो।
यस्तै, लुम्बिनी वर्ल्ड पीस फोरमका वृक्षारोपण अभियन्ता बासु गौतम, इलाम नगरपालिकाका मेयर केदार थापा, तथा विभिन्न वडाका जनप्रतिनिधि नुतन देव दुलाल (वडा ४), दुर्गा मदन श्रेष्ठ (वडा ६), दलमान तामाङ (वडा ६), ओमनाथ प्रधान (वडा १०), पारस मणि काफ्ले (वडा ४) र कृषि प्राविधिक उपेन्द्र नेपाल पनि सहभागी थिए।

सन नेपाल लाइफ इन्स्योरेन्सले सामुदायिक दिगोपन, सामाजिक उत्तरदायित्व र वातावरणीय सन्तुलनलाई आफ्नो संस्थागत दर्शनको प्रमुख आधार बनाउँदै देशभर यस्ता कार्यक्रम विस्तार गरेको छ।

कम्पनीले हाल १४८ शाखा तथा उप–शाखा मार्फत जीवन बीमा सेवा प्रदान गर्दै आएको छ।