काठमाडौं। असोज १८ गतेदेखि सुरु भएको अविरल वर्षा तथा बाढी–पहिरोका कारण देशभर भएको भौतिक तथा आर्थिक क्षतिको विपत्–दाबी निर्जीवन बीमा कम्पनीहरूमा तीव्र गतिमा दर्ता हुँदै आएका छन्। हालसम्म ७८१ वटा प्रारम्भिक बीमा दाबी दर्ता भइसकेका छन्। ती दाबीहरूको कूल प्रारम्भिक रकम करिब रू. ४ अर्ब ४ करोड रहेको बीमा प्राधिकरणले जनाएको छ।

प्राधिकरणका अनुसार दर्ता भएका दाबीहरूमध्ये ६७ वटा दाबी समेटी करिब रू. १ करोड ८८ लाख रकम बीमितलाई भुक्तानी गरिसकिएको छ। बाँकी दाबीहरूको विवरण संकलन, मूल्यांकन तथा भुक्तानी प्रकृया क्रमशः अघि बढिरहेको बताइएको छ।

प्राधिकरणले उपलब्ध गराएको अद्यावधिक तथ्यांक अनुसार १३ निर्जीवन बीमा कम्पनी र २ लघु निर्जीवन बीमा कम्पनी मार्फत विभिन्न बीमा योजनामा दाबी दर्ता र जोखिम मूल्यांकनको काम जारी छ। प्रभावित क्षेत्रमा क्षतिको यथार्थ विवरण अझै संकलन भइरहेकाले दाबीको सङ्ख्या र रकम थप वृद्धि हुने अनुमान गरिएको छ।