काठमाडौं । सामुदायिक विद्यालयमा अध्ययनरत छात्राहरूको संख्या घट्दै गएको परिस्थितिलाई ध्यानमा राख्दै शिवम् सिमेन्ट लिमिटेडले हेटौँडा–१७, हटियास्थित लक्ष्मी आधारभूत विद्यालयका छात्राहरूलाई छात्रवृत्ति प्रदान गरेको छ।

कम्पनीले उद्योग प्रभावित क्षेत्रभित्र पर्ने उक्त विद्यालयमा अध्ययनरत १ देखि ८ कक्षासम्मका १०४ जना छात्राहरूका लागि चालू शैक्षिक सत्रको आठ महिनाको शुल्क बराबरको छात्रवृत्ति हस्तान्तरण गरेको हो। छात्रवृत्ति हस्तान्तरण कार्यक्रम मंगलबार विद्यालय परिसरमा आयोजित औपचारिक कार्यक्रममार्फत सम्पन्न गरिएको थियो।

कार्यक्रममा १७ नं. वडा जनप्रतिनिधि, शिवम् सिमेन्टका प्रतिनिधि, विद्यालय व्यवस्थापन समिति, विद्यालयका प्रधानाध्यापकलगायतको उपस्थिति रहेको थियो। कम्पनीका अनुसार छात्रवृत्तिबाट छात्राहरूको मनोबल बढ्ने र विद्यालयमा छात्रा उपस्थितिमा वृद्धि हुने अपेक्षा गरिएको छ।

विद्यालयका प्रधानाध्यापक यदुदेव उपाध्याय सिग्देलले छात्रा शिक्षामा सहयोग पुगेकोप्रति शिवम् सिमेन्टप्रति आभार व्यक्त गर्दै यस किसिमको सहकार्यले सामुदायिक विद्यालयको शैक्षिक वातावरण सुधार गर्न मद्दत पुग्ने बताए। उनले उद्योग स्थापना भएको २०७८ सालदेखि निरन्तर सहकार्य गर्दै आएको उल्लेख गर्दै आगामी सत्रदेखि पूर्ण छात्रवृत्ति उपलब्ध गराउन आग्रह पनि गरे।

यसअघि पनि शिवम् सिमेन्टले आफ्नो सामाजिक उत्तरदायित्वअन्तर्गत विद्यालयमा कम्पाउन्ड वाल निर्माण, स्कुल बस व्यवस्था, कम्प्युटर–प्रिन्टर तथा अन्य शैक्षिक सामग्री प्रदान गर्दै आएको कम्पनीले जनाएको छ।