काठमाडौं। नेपाल र भियतनामबीच कूटनीतिक (दौत्य) सम्बन्ध स्थापना भएको ५० वर्ष पूरा भएको अवसरमा दुवै देशका व्यवसायीबीच आर्थिक सम्बन्ध विस्तारबारे भियतनामको राजधानी हनोइमा विशेष छलफल गरिएको छ।

भियतनामी चेम्बर अफ कमर्स एन्ड इन्डस्ट्री (VCCI) मा आयोजित छलफलमा नेपाली व्यवसायीहरूले पर्यटन, जलविद्युत्, कृषि, हस्तकला, चिया, कफी तथा जडीबुटी जस्ता क्षेत्रहरूमा भियतनामी लगानीकर्ताका लागि नेपालमा ठूलो अवसर रहेको उल्लेख गर्दै लगानीका लागि आग्रह गरे।

नेपाल उद्योग वाणिज्य महासंघ (FNCCI) का अध्यक्ष चन्द्रप्रसाद ढकालले नेपाल–भियतनाम आर्थिक सहकार्यलाई नयाँ उचाइमा पुर्‍याउन आग्रह गर्दै दुवै देशका अर्थतन्त्र एक–अर्काका पूरक बन्न सक्ने बताए। नेपालबाट चिया, कफी, हस्तकला तथा जडीबुटीजस्ता उत्पादन भियतनाममा राम्रो बजार पाउन सक्ने उल्लेख गर्दै उनले प्रत्यक्ष विदेशी लगानीमैत्री कानुन, लाइसेन्स, कर तथा भन्सार प्रशासनमा भएको सुधारले लगानी वातावरण थप सहज भएको जानकारी दिए।

पर्यटन क्षेत्र—होटल, रिसोर्ट, केबलकार, साहसिक पर्यटन तथा वेलनेस केन्द्रहरूमा क्षेत्रीय लगानी बढिरहेको उल्लेख गर्दै ढकालले भियतनामी लगानीकर्तालाई नेपालले स्वागत गर्न तयार रहेको बताए। उनले भियतनामी प्रतिनिधिमण्डललाई आगामी वार्षिक साधारणसभामा सहभागी भई नेपालको व्यवसायिक वातावरण प्रत्यक्ष अवलोकन गर्न निम्तो पनि दिए।

VCCI का उप–कार्यकारी अध्यक्ष न्गुयेन क्याङ भिनले भियतनाम नेपालसँग आर्थिक साझेदारी सुदृढ गर्न इच्छुक रहेको बताए। व्यापार र लगानीका क्षेत्रमा हाल ठूलो सहकार्य नभए पनि सम्भावना अत्यधिक रहेको उल्लेख गर्दै उनले आगामी दिनमा दुवै देशबीचको आर्थिक सहकार्य अझ बलियो हुने विश्वास व्यक्त गरे।

कार्यक्रममा थाइल्यान्ड तथा भियतनामका लागि नेपाली राजदूत धनबहादुर ओलीले ऊर्जा, कृषि, पर्यटनलगायत क्षेत्रमा नेपालमा लगानीका अपार सम्भावना रहेको भन्दै दुवै देशले उपलब्ध अवसर सदुपयोग गर्नुपर्नेमा जोड दिए। विश्व अर्थतन्त्रका चुनौतीबीच आपसी आर्थिक सहकार्यबाट लाभ लिन सकिने उनले औँल्याए।

छलफलमा उद्योग वाणिज्य महासंघका कार्यसमितिका पदाधिकारी तथा सदस्यहरूको समेत सहभागिता रहेको थियो।