काठमाडौं । माछापुच्छ्रे क्यापिटल लिमिटेड र पिस इनर्जी कम्पनी लिमिटेडबीच पिस इनर्जी कम्पनीको प्राथमिक शेयर (आईपीओ) निष्कासनका लागि संस्थागत परामर्श सेवा तथा निष्कासन तथा बिक्री प्रबन्ध सेवा प्रदान गर्ने सम्बन्धमा आज मिति २०८२/०९/२१ गते सम्झौता सम्पन्न भएको छ।

सम्झौताअनुसार पिस इनर्जी कम्पनी लिमिटेडले जारी पुँजीको २० प्रतिशत बराबरको ३२ लाख कित्ता साधारण शेयर सर्वसाधारणमा निष्कासन गर्न माछापुच्छ्रे क्यापिटल लिमिटेडलाई संस्थागत परामर्शदाता तथा निष्कासन तथा बिक्री प्रबन्धकको रूपमा नियुक्त गरेको हो।

सम्झौता समारोहमा धितोपत्र निष्कासन तथा बिक्री प्रबन्धक संस्था माछापुच्छ्रे क्यापिटल लिमिटेडको तर्फबाट प्रमुख कार्यकारी अधिकृत श्री उपेन्द्र मालाकार तथा निष्कासनकर्ता कम्पनी पिस इनर्जी कम्पनी लिमिटेडको तर्फबाट कार्यकारी अध्यक्ष डा. मदन कुमार उप्रेतीले सम्झौता पत्रमा हस्ताक्षर गर्नुभएको थियो।

पिस इनर्जी कम्पनी लिमिटेडले ताप्लेजुङ जिल्लाको सिरिजङ्घा गाउँपालिकाबाट बग्ने कावेली खोलाको पानीको बहाव सदुपयोग गर्दै २८.१ मेगावाट क्षमताको माथिल्लो कावेली जलविद्युत आयोजना निर्माण गरिरहेको छ। आयोजनाको भौतिक प्रगति हालसम्म ६१ प्रतिशतभन्दा बढी भइसकेको छ भने मिति २०८३ कार्तिक १४ भित्र निर्माण सम्पन्न गरी राष्ट्रिय प्रसारण लाइनमा जोड्ने लक्ष्य राखिएको छ।

माछापुच्छ्रे क्यापिटल लिमिटेड, माछापुच्छ्रे बैंक लिमिटेडको सहायक कम्पनी हो। सार्वजनिक सीमित कम्पनीको रूपमा स्थापित धितोपत्र व्यवसायी (मर्चेन्ट बैंकर) माछापुच्छ्रे क्यापिटलले नेपाल धितोपत्र बोर्डको स्वीकृतिसहित धितोपत्र प्रत्याभूति, लगानी व्यवस्थापन, संस्थागत परामर्श सेवा, निक्षेप सदस्य सेवा, निष्कासन तथा बिक्री प्रबन्धक, शेयर रजिस्ट्रार तथा सामूहिक लगानी कोषसम्बन्धी सेवा प्रदान गर्दै आइरहेको छ।