काठमाडौं । सिटिजन्स क्यापिटल लिमिटेड योजना व्यवस्थापक तथा डिपोजिटरी र सिटिजन्स बैंक इन्टरनेसनल लिमिटेड कोष प्रवर्द्धक रहेको सिटिजन्स म्युचुअल फण्ड अन्तर्गतको चौथो बन्दमुखी योजना ‘सिटिजन्स सन्तुलित योजना’ मा मागभन्दा उल्लेख्य रूपमा बढी आवेदन परेको छ ।

रु. १ अर्ब आकारको उक्त योजनाको इकाई बिक्रीका लागि नेपाल धितोपत्र बोर्डबाट अनुमति प्राप्त भई २०८२ साल पौष ४ गतेदेखि पौष १८ गतेसम्म सार्वजनिक निष्काशन तथा बिक्री खुला गरिएको थियो । प्रारम्भिक विवरण अनुसार सो अवधिभित्र सर्वसाधारण तथा संस्थागत लगानीकर्ताबाट रु. १ अर्ब २५ करोडभन्दा बढी, अर्थात मागभन्दा करिब २५ प्रतिशत बढी रकमका लागि आवेदन प्राप्त भएको सिटिजन्स क्यापिटलले जनाएको छ ।

उक्त योजना बढी आवेदन प्राप्त गर्ने म्युचुअल फण्डहरूमध्ये एक हुन सफल भएको कम्पनीको भनाइ छ । योजनाप्रति लगानीकर्ताको आकर्षण र उल्लेखनीय सहभागिताले सिटिजन्स क्यापिटल लिमिटेडलाई नेपालको पूँजी बजारमा दक्ष, व्यवसायिक तथा विश्वसनीय संस्थाको रूपमा स्थापित गरेको संकेत गर्ने कम्पनीले उल्लेख गरेको छ ।

सिटिजन्स बैंक इन्टरनेसनल लिमिटेडको सहायक कम्पनीका रूपमा रहेको सिटिजन्स क्यापिटलमा कर्मचारी सञ्चय कोष तथा प्रतिष्ठित उद्योगी–व्यवसायीहरूको लगानी रहेको छ । कम्पनीका अध्यक्ष राजेन्द्र लाल श्रेष्ठ तथा प्रमुख कार्यकारी अधिकृत सबिर बादे श्रेष्ठ रहेका छन् ।

सिटिजन्स क्यापिटलले योजना व्यवस्थापक तथा डिपोजिटरी, पोर्टफोलियो व्यवस्थापन सेवा, धितोपत्र प्रत्याभूति, धितोपत्र निष्काशन तथा बिक्री प्रबन्धक, शेयर रजिस्ट्रार सेवा तथा संस्थागत परामर्श सेवा लगायतका सेवाहरू प्रदान गर्दै आएको छ ।

कम्पनीले आगामी दिनहरूमा पारदर्शिता, सुशासन र लगानी जोखिम व्यवस्थापनमा निरन्तर सुधार गर्दै प्रविधिमैत्री तथा लगानीमैत्री सेवामार्फत लगानीकर्तालाई विश्वसनीय र प्रतिस्पर्धी सेवा प्रदान गर्ने प्रतिबद्धता जनाएको छ । साथै, निकट भविष्यमा विभिन्न प्रकृतिका सामूहिक लगानी कोषका नयाँ योजनाहरू सञ्चालन गर्ने र हालका योजनामार्फत उच्च प्रतिफल प्रदान गर्ने उद्देश्यसहित कार्यरत रहने जनाएको छ ।