भारत, वैशाली । दक्षिण एसियाका बहुभाषिक समाजमा लोप हुँदै गएका भाषा र संस्कृतिको संरक्षणमा पत्रकारिताले महत्वपूर्ण भूमिका खेल्न सक्ने निष्कर्षसहित भारतको नालन्दा खुला विश्वविद्यालयमा आयोजित अन्तर्राष्ट्रिय मातृभाषा पत्रकारिता सम्मेलन सोमबार सम्पन्न भएको छ।

सार्क जर्नलिस्ट फोरम इन्टरनेशनलको भारतस्थित बिहार च्याप्टरले अमरपाली कला–साहित्य सम्मेलन तथा मानवअधिकार टुडेसँग सहकार्य गरी आयोजना गरेको उक्त सम्मेलन दुई दिनसम्म सञ्चालन भएको थियो। सम्मेलनले पत्रकारिता केवल सूचना प्रवाहको माध्यम मात्र नभई मातृभाषा संरक्षणको सशक्त औजार बन्न सक्ने निष्कर्ष निकालेको छ।

सम्मेलनमा नेपालका तर्फबाट सहभागी नेवाः पत्रकार राष्ट्रिय दबूका केन्द्रीय अध्यक्ष नृपेन्द्रलाल श्रेष्ठले दक्षिण एसियामा मातृभाषा पत्रकारितामार्फत भाषा–संस्कृति जोगाउन पत्रकारहरूबीच आपसी ज्ञान, सीप र अनुभव आदान–प्रदानलाई केन्द्रमा राखेर छलफल गरिएको जानकारी दिनुभयो।

मातृभाषा लोपोन्मुख बन्दै गएको सन्दर्भमा पत्रकारिताको भूमिकाबारे चर्चा गर्दै सम्मेलनमा सहभागी पत्रकार राजु नापितले बहुभाषिक तथा बहुसांस्कृतिक दक्षिण एसियामा पत्रकारितामार्फत लोप हुँदै गएका भाषा र संस्कृतिलाई कसरी संरक्षण गर्न सकिन्छ भन्ने विषयमा गहन विमर्श भएको बताउनुभयो। नेवाः पत्रकार राष्ट्रिय दबू मातृभाषा पत्रकारिता सम्मेलनमा दोस्रो पटक सहभागी भएको पनि उहाँले जानकारी दिनुभयो।

सार्क जर्नलिस्ट फोरम बिहारका अध्यक्ष तथा मानवअधिकार टुडेका सम्पादक शशिभूषण कुमारको अध्यक्षतामा सम्पन्न सम्मेलनका प्रमुख अतिथि पूर्व सिक्किम राज्यपाल गंगाप्रसाद रहनुभएको थियो। सम्मेलनमा मौरिससका पूर्व उपप्रधानमन्त्री हरिश बुद्धुकी धर्मपत्नी तथा अन्तर्राष्ट्रिय संस्कृति संवाहिका डा. सरिता बुद्धु, नेपालबाट सार्क जर्नलिस्ट फोरमका अन्तर्राष्ट्रिय अध्यक्ष राजु लामा, थाइल्याण्डका प्रतिनिधि डा. पी. सी. चन्द्रा लगायत विभिन्न देशका करिब तीन दर्जन प्रतिनिधिहरूको सहभागिता रहेको थियो।

यो सम्मेलन बिहारमा सम्पन्न भएको चौथो अन्तर्राष्ट्रिय सम्मेलन भएको सार्क जर्नलिस्ट फोरम बिहारका अध्यक्ष शशिभूषण कुमारले जानकारी दिनुभयो। सम्मेलनका अवसरमा नेपालबाट सहभागी पत्रकारहरूलाई अन्तर्राष्ट्रिय मातृभाषा पत्रकारिता अवार्ड प्रदान गरिएको थियो। अवार्ड प्राप्त गर्ने पत्रकारहरूमा नृपेन्द्रलाल श्रेष्ठ, राजु नापित, सदाब मलिक, दिपेन्द्र प्रजापति, अभिलाष गुप्ता, शैलेश गुप्ता, राजन कुमार सिंह र सुभास राम रहेका छन्।