धरान, पुस ३० । सूर्य नेपाल गल्फ टुर २०२५–२६ अन्तर्गत दोस्रो प्रतियोगिता सूर्य नेपाल इस्टर्न ओपन सुरु भएको छ । प्रतियोगिताको पहिलो दिन नेपाल नम्बर एक प्रो गल्फर निरज तामाङ उत्कृष्ट प्रदर्शन गर्दै शीर्षस्थानमा रहन सफल भएका छन् ।

धरान गल्फ क्लबमा सम्पन्न पहिलो राउन्डमा डिफेन्डिङ च्याम्पियन निरजले ६–अन्डर ६४ को शानदार स्कोर निकाल्दै टंकबहादुर कार्की र बलभद्र राईमाथि ३ स्ट्रोकको अग्रता बनाएका छन् । ३–अन्डर ६७ को स्कोर बनाएका टंक र बलभद्र संयुक्त रूपमा दोस्रो स्थानमा रहेका छन् ।

१–अन्डर ६९ को स्कोरमा पूर्व नम्बर एक गल्फरद्वय शुक्रबहादुर राई र भुवन नगरकोटीसँगै एमेच्योर खेलाडी प्रकृत तामाङ र राहुल विश्वकर्मा संयुक्त रूपमा चौथो स्थानमा रहेका छन् । इभन–पार ७० को स्कोर बनाएका रवि खड्का, जयराम श्रेष्ठ र सुमन परियार संयुक्त रूपमा आठौँ स्थानमा छन् ।

डिफेन्डिङ च्याम्पियन निरजले दोस्रो होलमा बोगी खेपे पनि त्यसपछि उत्कृष्ट पुनरागमन गर्दै तेस्रो, पाँचौँ, छैटौँ र नवौँ होलमा बर्डी प्रहार गरे । फ्रन्ट नाइन ३–अन्डर ३३ मा पूरा गरेका उनले ब्याक नाइनमा १२औँ, १३औँ, १६औँ र १८औँ होलमा बर्डी प्रहार गर्दै १५औँ होलको बोगीका बाबजुद ब्याक नाइन ३–अन्डर ३१ मा समाप्त गरे ।

टंक कार्कीले फ्रन्ट नाइन १–अन्डर ३५ मा पूरा गरे । आठौँ र नवौँ होलमा लगातार बर्डी प्रहार गरेका उनले ब्याक नाइनमा १४औँ र १८औँ होलमा बर्डी गर्दै बोगीरहित २–अन्डर ३२ खेले ।

धरानका भेट्रान प्रो बलभद्र राईले फ्रन्ट नाइनमा बोगीरहित खेल प्रदर्शन गर्दै तेस्रो र सातौँ होलमा बर्डी प्रहार गरी २–अन्डर ३४ को स्कोर निकाले । ब्याक नाइनमा १०औँ होलमा बोगी खेपे पनि १५औँ र १८औँ होलको बर्डीले १–अन्डर ३३ मा समाप्त गरे ।

एमेच्योरतर्फ राहुल विश्वकर्मा र प्रकृत तामाङ १–अन्डर ६९ को स्कोरसहित संयुक्त रूपमा शीर्षस्थानमा रहेका छन् भने राम तामाङ १–ओभर ७१ सहित तेस्रो स्थानमा छन् ।

सूर्य नेपाल प्रा.लि.को प्रायोजनमा तीन दिनसम्म चल्ने ५४ होलको यस प्रतियोगितामा कुल पुरस्कार राशि १० लाख ५० हजार रुपैयाँ रहेको छ । उपाधि विजेताले १ लाख ७० हजार रुपैयाँ, उपविजेताले १ लाख २५ हजार र तेस्रो हुने खेलाडीले १ लाख रुपैयाँ पुरस्कार प्राप्त गर्नेछन् । शीर्ष १८ स्थानसम्मका खेलाडीले नगद पुरस्कार पाउनेछन् ।