काठमाडौं । हिमालयन लाइफ इन्स्योरेन्स लिमिटेडको सञ्चालक समितिको माघ २ गतेको बैठकले माघ २८, बुधबार बिहान १० बजे काठमाडौं, नक्सालस्थित आम्रपाली ब्याङ्क्वेटमा उन्नाइसौँ वार्षिक साधारणसभा बस्ने निर्णय गरेको छ।

कम्पनीले यसअघि पुस २५ मा बसेको बैठकमा गत आर्थिक वर्षको सञ्चित मुनाफाबाट शेयरधनीलाई लाभांश नबाँड्ने निर्णय गरिसकेको थियो। साधारणसभाले सञ्चालक समितिको वार्षिक प्रतिवेदन, लेखापरीक्षकको प्रतिवेदन, वासलात, नाफा/नोक्सान हिसाब र नगद प्रवाह विवरणमाथि छलफल गरी पारित गर्नेछ।

सभाले कम्पनी ऐन, २०६३ अनुसार चालू आर्थिक वर्षका लागि बाह्य लेखापरीक्षकको नियुक्ति र पारिश्रमिक अनुमोदन गर्नेछ। आवश्यक परे नियमनकारी निकायका निर्देशन अनुसार प्रस्तावमा संशोधन गर्ने अधिकार पनि सञ्चालक समितिलाई दिने निर्णय सभामा तय गरिएको छ।

कम्पनीले साधारणसभाका लागि शेयर दाखिल खारेज (बुक क्लोज) माघ १५ तय गरेको छ। यस अनुसार माघ १४ सम्म नेप्सेमा कायम शेयरधनीहरूले मात्र सभामा भाग लिन सक्नेछन्।