काठमाडौं । सोलु हाइड्रोपावर लिमिटेडको प्राथमिक शेयर (आईपीओ) बाँडफाँट अर्को साता हुने भएको छ । कम्पनीको धितोपत्र निष्कासन तथा बिक्री प्रबन्धक नबिल इन्भेष्टमेन्ट बैंकिङ लिमिटेड र हिमालयन क्यापिटल लिमिटेडले आईपीओ बाँडफाँटका लागि आवश्यक प्रक्रिया अन्तिम चरणमा पुर्‍याइरहेका छन् ।

कम्पनीको आईपीओमा कुल २५ लाख ७० हजार ४२२ जना आवेदकले ३ करोड १७ लाख ८ हजार ३९० कित्ता शेयरका लागि ३ अर्ब १७ करोड ८ लाख ३९ हजार रुपैयाँ बराबरको आवेदन दिएका छन् । यो माग निष्कासन गरिएको शेयरभन्दा ३.८६ गुणाले बढी हो ।

आईपीओ बाँडफाँटपछि करिब ८ लाख २० हजार आवेदकले १० कित्ताका दरले शेयर प्राप्त गर्नेछन् । कम्पनीले प्रतिकित्ता १०० रुपैयाँका दरले कुल २ करोड कित्ता आईपीओ निष्कासन गर्ने अनुमति पाएको थियो । जसमध्ये आयोजना प्रभावित स्थानीयवासीका लागि १ करोड कित्ता र वैदेशिक रोजगारीमा रहेका नेपालीका लागि १० लाख कित्ता शेयर पहिले नै बाँडफाँट गरिसकिएको छ ।

अब बाँकी ९० लाख कित्तामध्ये ५ लाख कित्ता सामूहिक लगानी कोषका लागि र ३ लाख कित्ता कम्पनीका कर्मचारीका लागि सुरक्षित गरिएको थियो । यसपछि बाँकी रहेको ८२ लाख कित्ता सर्वसाधारणका लागि निष्कासन गरिएको हो ।

आईपीओ निष्कासनका लागि गरिएको रेटिङमा इन्फोमेरिक्स क्रेडिट रेटिङ नेपालले सोलु हाइड्रोपावर लिमिटेडलाई ‘आईआरएन डबल बी इस्यूअर रेटिङ’ प्रदान गरेको छ ।