काठमाडौं । नारायणी डेभलपमेन्ट बैंक लिमिटेडले आफ्नो अवितरित हकप्रद शेयर पुनः लिलाम बिक्रीमा ल्याएको छ। बैंकले असोज २ गतेदेखि कात्तिक ९ गतेसम्म हकप्रद शेयर बाँडफाँड गर्दा संस्थापक समूहतर्फ ६,०३,१६२ कित्ता शेयर बाँकी रहँदा, मंसिर १८–२५ गतेसम्म लिलाम बढाबढ मार्फत् २,९६,६५६ कित्ता मात्र बिक्री भएको थियो।

यसरी अझै बाँकी रहेको ३,०६,५९७ कित्ता अवितरित शेयर माघ १८ देखि फागुन ४ गतेसम्म गोप्य शिलबन्दी बोलपत्र पेश गरी बिक्री हुने बैंकले जानकारी दिएको छ।

शेयरको न्यूनतम मूल्य प्रति कित्ता रू १०० तोकिएको छ भने न्यूनतम १०० कित्ताका लागि आवेदन दिनुपर्नेछ। इच्छुक व्यक्ति वा संस्थाले आफैंले किन्न चाहेको शेयर संख्या र मूल्य खुलाएर बोलपत्र पेश गर्न सक्नेछन्।

बोलपत्र फाराम काठमाडौंको नक्सालस्थित ग्लोबल आइएमई क्यापिटल लिमिटेड तथा ग्लोबल आइएमई बैंकका विराटनगर, आदर्शनगर, वीरगंज, हेटौंडा, नारायणगढ, न्यूरोड (पोखरा) र बुटवल (मिलनचोक) शाखा कार्यालयमा उपलब्ध छन् र सोही स्थानमा बुझाउन सकिनेछ।