काठमाडौ । सिटिजन लाइफ इन्स्योरेन्स कम्पनी लिमिटेडको चार दिने ‘मिड–इयर बिजनेस स्ट्राटिजी कन्फेरेन्स’ उत्साहजनक रूपमा सम्पन्न भएको छ। माघ १७ देखि २० गतेसम्म सञ्चालन भएको उक्त कार्यक्रमअन्तर्गत औपचारिक सत्र सुकुटेमा आयोजना गरिएको थियो।

कम्पनीका अनुसार सम्मेलनमा सहभागीहरूलाई दोलखा जिल्लाको कालिञ्चोक र शैलुङ क्षेत्रमा भ्रमण गराई टोलीभाव विकास, प्रेरणा तथा ताजगी प्रदान गर्ने अवसर समेत सिर्जना गरिएको थियो।

मध्यावधि व्यवसायिक प्रगतिको समीक्षा, आगामी रणनीति निर्माण तथा कर्मचारीको मनोबल अभिवृद्धि गर्ने उद्देश्यले आयोजित कार्यक्रममा व्यवस्थापन टिम, विभाग प्रमुख तथा देशभरका शाखा व्यवस्थापक गरी ७७ जनाको सहभागिता रहेको थियो। कार्यक्रममा चालु आर्थिक वर्षको मध्यावधिसम्मको व्यवसायिक उपलब्धिको समीक्षा गर्दै आगामी लक्ष्य हासिल गर्ने रणनीतिबारे छलफल गरिएको कम्पनीले जनाएको छ।

सम्मेलनको मुख्य आकर्षणका रूपमा चालु आर्थिक वर्षको मध्यावधिसम्म १०० प्रतिशत व्यवसायिक लक्ष्य हासिल गर्न सफल ४८ जना शाखा व्यवस्थापकलाई व्यवस्थापन टिमले सम्मान गरेको थियो। यसले शाखा नेतृत्वलाई थप उत्साहित र जिम्मेवार बनाउने विश्वास कम्पनीले व्यक्त गरेको छ।

त्यसैगरी कार्यक्रममा कम्पनीका सेवा थप ग्राहक–केन्द्रित, प्रविधिमैत्री तथा सरल बनाउने विषयमा प्रशासनिक सुधारबारे पनि छलफल भएको थियो। प्रक्रियालाई छिटो, पारदर्शी र सहज बनाउन व्यवस्थापन र शाखा स्तरबीच समन्वय बढाउने विषयमा जोड दिइएको कम्पनीले जनाएको छ।

कम्पनीले आगामी दिनमा डिजिटल सेवाको विस्तार, नियामकीय निर्देशनको पूर्ण पालना तथा संस्थागत सुशासनलाई प्राथमिकतामा राख्दै व्यवसायिक लक्ष्य हासिल गर्ने प्रतिबद्धता व्यक्त गरेको छ।