काठमाडौं, ५ फेब्रुअरी – ब्रिटिस काउन्सिल नेपालले ग्लोबल च्यानल पार्टनर क्याम्पेन २०२५ अन्तर्गत आइइएलटिएस प्रवर्द्धनमा उल्लेखनीय योगदान पुर्‍याएका साझेदार संस्थाहरूलाई सम्मान गरेको छ। बिहीबार काठमाडौंमा आयोजित कार्यक्रममा उत्कृष्ट साझेदारहरूको घोषणा गरिएको हो।

ब्रिटिस काउन्सिलका अनुसार नेपालमा आइइएलटिएसको पहुँच विस्तार तथा गुणस्तरीय सञ्चालनमा महत्वपूर्ण भूमिका खेलेका शैक्षिक परामर्श संस्था र सम्बन्धित क्षेत्रका प्रतिनिधिहरू कार्यक्रममा सहभागी भएका थिए। १ अगस्ट २०२५ देखि ३१ जनवरी २०२६ सम्म सञ्चालन भएको अभियानअन्तर्गत उत्कृष्ट १० साझेदारलाई सम्मान गरिएको जनाइएको छ।

आगामी मार्च २३ देखि २७ सम्म लन्डनमा आयोजना हुने ग्लोबल च्यानल पार्टनर मिट–अप तथा अवार्ड समारोहमा नेपालबाट चयन भएका साझेदार संस्थाहरूलाई विश्वव्यापी रूपमा सम्मान गरिनेछ। लन्डनमा सम्मानित हुने संस्थामा अर्बिट मेडिकल इन्ट्रान्स प्रा.लि., केआइइसी लर्निङ सेन्टर प्रा.लि., द नेक्स्ट एजुकेसन कन्सल्टेन्सी प्रा.लि. र नेपाल शैक्षिक परामर्श संघ (इक्यान) रहेका छन्।

यसैगरी, एक्सपर्ट एजुकेसन एन्ड भिसा सर्भिस, आरटीसी इङ्लिस, युनी कन्सल्टेन्ट एलायन्स, बिर्तामोड एजुकेसन फाउन्डेसन, ग्रेस इन्टरनेशनल ग्रुप, एइसीसी ग्लोबल र सुमेधा एजुकेसन नेटवर्कलाई पनि उत्कृष्ट साझेदारका रूपमा सम्मान गरिएको छ।

ब्रिटिस काउन्सिल नेपालकी परीक्षासम्बन्धी राष्ट्रिय निर्देशक प्रतिष्ठा थापा रायमाझीले आइइएलटिएसमा विश्वस्तरीय मापदण्ड कायम राख्न साझेदार संस्थाहरूको भूमिका महत्वपूर्ण रहेको बताउनुभयो। बिजनेस डेभलपमेन्ट प्रमुख सुदर्शन सुवेदीले सम्मानित संस्थाहरूले अन्तर्राष्ट्रिय अनुभव आदान–प्रदान गर्दै नेपालमा आइइएलटिएस सेवा अझ प्रभावकारी बनाउन सहयोग पुग्ने विश्वास व्यक्त गर्नुभयो।

ब्रिटिस काउन्सिलका अनुसार आइइएलटिएस विश्वभर १२ हजारभन्दा बढी संस्थाले मान्यता दिएको अन्तर्राष्ट्रिय अंग्रेजी भाषा परीक्षण प्रणाली हो।