काठमाडौं । नेपाल बीमा प्राधिकरणले बीमा सम्बन्धी विवाद तथा उजुरीहरूको फछ्र्यौटलाई प्राथमिकताका साथ अघि बढाएको जनाएको छ। प्राधिकरणले प्रकाशित गरेको बीमा प्रतिबिम्ब अनुसार चालु आर्थिक वर्षको पुस मसान्तसम्म ७१ वटा नयाँ मुद्दा दर्ता भएका छन्।

समीक्षा अवधिमा केन्द्रीय कार्यालयमा ५० वटा र प्रदेश कार्यालयमा २१ वटा मुद्दा दर्ता भएका हुन्। गत आर्थिक वर्षबाट बाँकी रहेका ३९४ मुद्दासहित हाल कुल ४६५ वटा मुद्दा विचाराधीन रहेका छन्।

प्राधिकरणका अनुसार सो अवधिमा ३३ वटा मुद्दामा फैसला गरिएको छ भने ४६ वटा मुद्दामा पक्षहरूबीच सहमति गराइएको छ। तर, गत आर्थिक वर्षको सोही अवधिको तुलनामा उजुरी फछ्र्यौटको संख्या घटेको देखिएको छ। गत वर्ष सोही अवधिमा १३१ वटा उजुरी फछ्र्यौट भएका थिए।

चालु आर्थिक वर्षको पुस मसान्तसम्म ४१६ वटा उजुरी फछ्र्यौट हुन बाँकी रहेको तथ्यांकले देखाएको छ। प्राधिकरणमा अध्यक्ष नियुक्ति सम्बन्धी विवाद तथा एक वर्षमै ६ जना अध्यक्ष परिवर्तन हुँदा प्रशासनिक र न्यायिक कार्यसम्पादन प्रभावित भएको बताइएको छ।

बीमा सम्बन्धी उजुरीको छिटो टुङ्गो लगाउन प्राधिकरणले इजलास सञ्चालन गर्दै आएको छ। यसअघि सञ्चालक समितिमा कोरम नपुग्दा निर्णय प्रक्रिया प्रभावित भएको थियो।

हाल प्राधिकरणले इतिहासमै पहिलो महिला अध्यक्षका रूपमा चन्द्रकला पौडेललाई नियुक्त गरेको छ। अन्य सञ्चालकहरूको नियुक्तिसँगै कोरम पूरा भएकाले अब न्यायिक तथा नीतिगत निर्णय प्रक्रिया तीव्र हुने अपेक्षा गरिएको छ।