पोखरा । पहिलो संस्करणको सफलतापछि पश्चिमाञ्चल अटोमोबाइल्स डिलर्स एशोसिएसन ले दोस्रो पटक ‘वाडा अटो शो २०२६’ आयोजना गर्ने भएको छ। कार्यक्रम यही चैत्र ११ देखि १५ गतेसम्म पोखरा को लेकसाइड, तालबाराही चोकस्थित खेल मैदानमा सञ्चालन हुने आयोजकले जानकारी दिएको छ।

प्रदर्शनीको व्यवस्थापन ग्लोबल एक्स्पोजिशन एण्ड मेनेजमेन्ट सर्भिसेज (जेम्स ईभेन्टस्) ले गर्नेछ। स्टल बुकिङ छिट्टै खुला गरिने जनाइएको छ।

नेपाली नयाँ वर्ष २०८३ को पूर्व सन्ध्यामा आयोजना हुन लागेको उक्त अटो शोमा साना, मझौला तथा ठूला सवारी साधनका कम्पनीहरूको सहभागिता रहनेछ। साथै विद्युतीय (ईभी) तथा आन्तरिक दहन इन्जिन (आईसीई) का नयाँ–नयाँ ब्रान्डहरू, अटो पार्ट्स, लुब्रिकेन्ट, टायर कम्पनीहरू, बैंक तथा वित्तीय संस्थाहरू लगायत अन्य सरोकारवाला व्यवसायीहरूको पनि सहभागिता रहने बताइएको छ।

आयोजकका अनुसार नयाँ वर्षलाई लक्षित गर्दै सहभागी कम्पनीहरूले विभिन्न छुट तथा आकर्षक अफरहरू सार्वजनिक गर्नेछन्। आधुनिक प्रविधियुक्त सवारी साधनको प्रदर्शनसँगै सूचनामूलक तथा मनोरञ्जनात्मक कार्यक्रमहरू पनि समावेश गरिनेछ।

अटोमोबाइल क्षेत्रको प्रवर्द्धन, नयाँ प्रविधिको जानकारी आदान–प्रदान तथा ग्राहक–व्यवसायीबीच प्रत्यक्ष अन्तरक्रियाको उद्देश्यले आयोजना गर्न लागिएको उक्त कार्यक्रमले स्थानीय बजारलाई चलायमान बनाउने अपेक्षा गरिएको छ।