काठमाडौं । केबीए ग्लोबल प्रा.लि.को आयोजनामा ‘गोल्डेन गेट इन्टरनेशनल कलेज केबीए ग्लोबल क्रिकेट क्ल्यास २०२६’ आगामी फेब्रुअरी २४ र २५ मा आयोजना हुने भएको छ। प्रतियोगिताको औपचारिक जानकारी काठमाडौंस्थित आर्याल होटलमा आयोजित मिडिया डे तथा प्रेस मिटमार्फत सार्वजनिक गरिएको हो।

आयोजकका अनुसार प्रतियोगिता वन डे क्रिकेट एकेडेमीमा सञ्चालन हुनेछ। प्रतियोगितामा १२ अन्तर–कलेज टिमहरूको सहभागिता रहनेछ, जसमा Golden Gate International Collegeसहित विभिन्न कलेजका टोलीहरू प्रतिस्पर्धामा उत्रनेछन्।

प्रेस मिटमा प्रतियोगिताको उद्देश्य, खेल तालिका, नियमावली तथा संरचनाबारे जानकारी दिइएको थियो। आयोजकले प्रतियोगितालाई युवाहरूमा खेल भावना, नेतृत्व क्षमता र अनुशासन विकास गर्ने साझा मञ्चका रूपमा अघि बढाइएको जनाएको छ।

टाइटल स्पोन्सर गोल्डेन गेट इन्टरनेशनल कलेजका प्रतिनिधिले शिक्षा र खेलकुदबीचको सहकार्यले विद्यार्थीहरूको समग्र व्यक्तित्व विकासमा महत्वपूर्ण योगदान पुर्‍याउने विश्वास व्यक्त गरे।

प्रेस मिटको अवसरमा प्रतियोगिताको आधिकारिक ट्रफीसमेत सार्वजनिक गरिएको थियो। कार्यक्रमको अन्त्यमा सञ्चारकर्मीहरूसँग अन्तरक्रिया गरिएको आयोजकले जनाएको छ।

प्रेस मिट सम्पन्न भएसँगै अब खेलप्रेमीहरूको ध्यान फेब्रुअरी २४ र २५ मा हुने प्रतिस्पर्धात्मक खेलतर्फ केन्द्रित भएको छ।