काठमाडौं। महालक्ष्मी विकास बैंकले वातावरण संरक्षण तथा दिगो बैंकिङ प्रवर्द्धनको उद्देश्यसहित पोखरामा दुईदिने कार्यशाला तथा फेवाताल किनारमा सामूहिक पदयात्रा कार्यक्रम सम्पन्न गरेको छ।

बैंकले वार्षिक कार्यक्रमअन्तर्गत फागुन २४ र २५ गते उक्त कार्यक्रम आयोजना गरेको जनाएको छ। कार्यक्रममा बैंकका विभागीय प्रमुख, प्रदेश प्रमुख, शाखा प्रबन्धक तथा अन्य कर्मचारीहरूको उत्साहजनक सहभागिता रहेको थियो।

कार्यशालामा आर्थिक वर्ष २०८२/८३ को हालसम्मको बैंकको समग्र वित्तीय अवस्था, हालै सम्पन्न निर्वाचनपछि सिर्जना भएको सकारात्मक आर्थिक वातावरण तथा अन्तर्राष्ट्रिय परिस्थितिबाट उत्पन्न हुन सक्ने सम्भावित आर्थिक चुनौतीबारे विश्लेषण गरिएको बैंकले जनाएको छ।

दिगो वित्तीय अभ्यासबारे जनचेतना अभिवृद्धि गर्ने उद्देश्यले ऐतिहासिक तथा पर्यावरणीय दृष्टिले महत्वपूर्ण फेवाताल किनारमा सामूहिक पदयात्रा आयोजना गरिएको थियो। कार्यक्रममा हरित बैंकिङ तथा दिगो वित्तीय रणनीतिको आवश्यकता बारे विशेष जोड दिइएको बैंकले जनाएको छ।

“सबल बैंक, सफल सहकार्य” भन्ने नारालाई आत्मसात गर्दै महालक्ष्मी विकास बैंकले विगत ३१ वर्षदेखि देशभर गुणस्तरीय वित्तीय सेवा प्रदान गर्दै आएको छ। बैंकका हाल देशभर १०३ शाखा कार्यालय रहेका छन् भने करिब ८ लाख ५० हजारभन्दा बढी ग्राहकहरू रहेको बैंकले जनाएको छ।