काठमाडौँ । नेपाल टेलिकमले आफ्नो प्रिपेड मोबाइल रोमिङ सेवा विस्तार गर्दै अब ६२ देशमा उपलब्ध गराएको जनाएको छ। कम्पनीले ती देशका ८९ वटा सेवा प्रदायकसँग सम्झौता गरेपछि सेवा दायरा विस्तार भएको हो।

चालु आर्थिक वर्षको साउन महिनापछि लाटभिया, स्लोभेनिया, टर्की, ताइवान (आरओसी), घाना, रोमानिया र लाओसका सेवा प्रदायकसँग नयाँ सम्झौता गरिएको छ। साथै पाकिस्तान, बेलारुस र श्रीलंकामा थप सेवा प्रदायकसँग पनि सहकार्य विस्तार गरिएको कम्पनीले जनाएको छ।

यसअघि नै अष्ट्रेलिया, भारत, जापान, अमेरिका, बेलायत लगायतका विभिन्न देशमा उपलब्ध रहेको यो सेवा अब युरोप, एशिया, अफ्रिका तथा मध्यपूर्वका धेरै देशमा विस्तार भएको छ। रोमिङ सेवा अन्तर्गत प्रयोगकर्ताले भ्वाइस, डाटा तथा एसएमएस सेवा प्रयोग गर्न सक्नेछन्।

विदेश जाने वा बसोबास गर्ने नेपालीहरूका लागि यो सेवा उपयोगी रहेको कम्पनीको भनाइ छ। प्रिपेड प्रयोगकर्ताका लागि भारत बाहेक अन्य देशमा रोमिङ सेवा स्वतः सक्रिय हुने सुविधा रहेको छ भने भारतका लागि भने मोबाइलबाट विशेष कोड डायल गरी सेवा सक्रिय गर्नुपर्ने हुन्छ।

त्यस्तै, पोस्टपेड प्रयोगकर्ताका लागि न्यूनतम ५ हजार रुपैयाँ ब्यालेन्स आवश्यक पर्ने व्यवस्था गरिएको छ। विदेश गइसकेपछि पनि आवश्यक कागजातसहित इमेलमार्फत सेवा सक्रिय गर्न सकिने सुविधा उपलब्ध छ।

रोमिङ सेवा सक्रिय भएपछि मोबाइल स्वतः विदेशी नेटवर्कमा कनेक्ट हुने भए पनि आवश्यक परेमा प्रयोगकर्ताले म्यानुअल रूपमा पनि नेटवर्क चयन गर्न सक्नेछन्।

कम्पनीले रोमिङ सेवासम्बन्धी थप जिज्ञासा वा गुनासोका लागि इमेलमार्फत सम्पर्क गर्न अनुरोध गरेको छ।