काठमाडौँ । कुमारी बैंक लिमिटेड ले आफ्ना ग्राहकहरूका लागि मास्टरकार्ड सेवा औपचारिक रूपमा सुरु गरेको छ । बिहीबार काठमाडौँमा आयोजित पत्रकार सम्मेलनमार्फत बैंकले डेबिट मास्टरकार्ड जारी गर्न सुरु गरेको घोषणा गरेको हो ।

कार्यक्रममा बैंकका प्रमुख कार्यकारी अधिकृत रामचन्द्र खनालले कुमारी बैंकले डिजिटल रूपान्तरण र ग्राहकमैत्री सेवामा निरन्तर अग्रसरता लिँदै आएको उल्लेख गर्दै मास्टरकार्डजस्ता विश्वव्यापी भुक्तानी प्रणालीले बैंकको सेवा क्षमतामा थप वृद्धि गर्ने विश्वास व्यक्त गरे ।

यसैगरी, बैंकका प्रमुख डिजिटल बैंकिङ अधिकृत अनिश ताम्रकारले मास्टरकार्डको महत्व, यसको प्रयोगका सम्भावना तथा ग्राहकलाई पुग्ने फाइदाबारे जानकारी दिँदै यस कार्डले भौतिक तथा डिजिटल दुवै माध्यमबाट सुरक्षित र सहज भुक्तानी गर्न सकिने बताए ।

बैंकका अनुसार यो डेबिट मास्टरकार्ड नेपाल, भारत र भुटानमा रहेका मास्टरकार्ड स्वीकार गर्ने एटीएम तथा पीओएस मेसिनहरूमा प्रयोग गर्न सकिन्छ । साथै, अनलाइन तथा अन्तर्राष्ट्रिय भुक्तानीसमेत यसमार्फत सहज रूपमा गर्न सकिने जानकारी दिइएको छ । बैंकले निकट भविष्यमा मास्टरकार्डको क्रेडिट कार्ड सेवा पनि सुरु गर्ने योजना बनाएको छ ।

यसअघि बैंकले भिसा कार्ड सेवा उपलब्ध गराउँदै आएको भए पनि ग्राहकको माग र आवश्यकतालाई ध्यानमा राख्दै थप विकल्पका रूपमा मास्टरकार्ड सेवा सुरु गरिएको हो । बैंकले हाल नयाँ योजना अन्तर्गत पहिलो वर्षका लागि वार्षिक शुल्क निःशुल्क गरेको छ भने सामान्य अवस्थामा वार्षिक शुल्क ५०० रुपैयाँ रहने जनाएको छ ।

नेपाल राष्ट्र बैंकको नियमअनुसार एक ग्राहकले एउटै बैंकबाट दुईवटा डेबिट कार्ड (भिसा र मास्टरकार्ड) लिन नपाउने भएकाले ग्राहकले यीमध्ये कुनै एक सेवा छनोट गर्नुपर्नेछ ।

विगत २४ वर्षदेखि सेवा दिँदै आएको कुमारी बैंकले देशभर २९७ शाखा, ३१५ एटीएम, ४६ एक्सटेन्सन काउन्टर र ४८ शाखारहित बैंकिङ इकाइमार्फत सेवा प्रदान गर्दै आएको छ । बैंकले आगामी दिनमा डिजिटल कारोबारलाई अझ प्राथमिकता दिँदै सरल, सुरक्षित र प्रभावकारी सेवा विस्तार गर्ने प्रतिबद्धता जनाएको छ ।