काठमाडौं । नेपालका दूरदर्शी चिन्तक तथा राजनीतिक सुधारक उज्वल थापा को जीवनयात्रामा आधारित बहुप्रतिक्षित वृत्तचित्र “दिमाग घोच्ने मान्छे” अब DGO (डी गो) OTT प्लेटफर्ममार्फत आधिकारिक रूपमा सार्वजनिक गरिएको छ।

निर्माण पक्षका अनुसार, वृत्तचित्रबाट संकलित आम्दानीको मुख्य अंश उज्वल थापा फाउन्डेसन लाई प्रदान गरिनेछ। यस पहलले उज्वल थापाले अघि सारेका सामाजिक तथा नागरिक अभियानहरूलाई संस्थागत रूपमा निरन्तरता दिन सहयोग पुग्ने अपेक्षा गरिएको छ।

उक्त वृत्तचित्रले उज्वल थापाको बाल्यकालदेखि अमेरिकामा प्राप्त शिक्षा र त्यसपछि नेपाल फर्किएर उद्यमशीलता तथा सामाजिक परिवर्तनका लागि उनले गरेको संघर्षलाई समेटेको छ। दुर्लभ भिडियो सामग्री तथा उनका सहकर्मी, साथीहरू र आलोचकहरूको अनुभवमार्फत तयार पारिएको चलचित्रले एक जिम्मेवार र प्रश्न गर्ने नागरिकको चित्र प्रस्तुत गर्दछ।

निर्माताहरूका अनुसार, “दिमाग घोच्ने मान्छे” केवल एक व्यक्तिको जीवनी नभई नयाँ पुस्तालाई सोच्न, प्रश्न गर्न र जिम्मेवारी लिन प्रेरित गर्ने प्रयास हो।

वृत्तचित्र हेर्नका लागि दर्शकहरूले DGO एप प्रयोग गर्न सक्नेछन्। नेपालमा यसको शुल्क रु. १९९ तोकिएको छ भने अमेरिका र अष्ट्रेलियामा ४.९९ अमेरिकी डलर र अन्य देशहरूमा २.९९ डलर शुल्क निर्धारण गरिएको छ।

उज्वल थापा फाउन्डेसन ले युवा नेतृत्व विकास, वैकल्पिक राजनीति तथा नागरिक सशक्तिकरणका क्षेत्रमा काम गर्दै आएको छ।