काठमाडौं, वैशाख ११ — Nepal Automobile Importers and Manufacturers Association (नाइमा) ले वरिष्ठ उद्योगपति Shekhar Golchha सँग सम्बन्धित पछिल्लो घटनाक्रमप्रति आफ्नो गम्भीर ध्यानाकर्षण भएको जनाएको छ। संस्थाले यस्ता विषयमा निर्णय लिनुअघि सम्बन्धित व्यक्तिलाई स्पष्टिकरण दिने पर्याप्त अवसर उपलब्ध गराइनुपर्नेमा जोड दिएको छ।

जारी प्रेस विज्ञप्तिमा नाइमाले प्रक्रियागत पारदर्शिता, सन्तुलन र विवेकपूर्ण निर्णय प्रक्रियाले मात्र समग्र प्रणालीप्रतिको विश्वास कायम राख्न सकिने उल्लेख गरेको छ। कुनै पनि आरोप वा विषयमा हतारमा निष्कर्ष निकाल्दा त्यसले संस्थागत विश्वसनीयतामा नकारात्मक प्रभाव पार्न सक्ने चेतावनी पनि दिएको छ।

नाइमाले निजी क्षेत्रले मुलुकको अर्थतन्त्र, रोजगारी सिर्जना, राजस्व संकलन तथा आर्थिक गतिविधिमा पुर्‍याउँदै आएको योगदान स्मरण गराउँदै यस्तो अवस्थामा उद्यमीहरूको मनोबल उच्च राख्नुपर्ने आवश्यकता औंल्याएको छ। साथै, राज्यले निजी क्षेत्रप्रति सकारात्मक सन्देश दिने खालका नीति र व्यवहार अपनाउनुपर्ने धारणा पनि व्यक्त गरेको छ।

संस्थाले विधिको शासन, पारदर्शिता र निष्पक्षताको पक्षमा आफू सधैं प्रतिबद्ध रहेको स्पष्ट पारेको छ। कुनै पनि विषयमा तथ्यका आधारमा निष्पक्ष अनुसन्धान हुनुपर्ने र कानून उल्लङ्घन गर्ने जो–कोहीलाई कारबाही हुनुपर्नेमा नाइमा दृढ रहेको बताइएको छ।

तर पर्याप्त प्रमाणबिना कुनै पनि व्यक्तिमाथि कठोर कदम चाल्दा समग्र प्रणालीप्रतिको विश्वास कमजोर हुन सक्ने भन्दै नाइमाले सम्बन्धित निकायहरूलाई संवेदनशील र जिम्मेवार ढंगले अघि बढ्न आग्रह गरेको छ।