काठमाडौं । प्रभु बैंक लिमिटेड ले आफ्नो संस्थागत सामाजिक उत्तरदायित्व (CSR) अन्तर्गत Hospital and Rehabilitation Center for Disabled Children (HRDC) लाई रु ७ लाख ५० हजार बराबरको आर्थिक सहयोग प्रदान गरेको छ।

काभ्रेपलाञ्चोक जिल्लाको बनेपा–११, जनागालमा रहेको एचआरडीसीलाई प्रदान गरिएको उक्त सहयोग लुम्बिनी, कर्णाली तथा सुदूरपश्चिम प्रदेशका विभिन्न स्थानमा बसोबास गर्ने शारीरिक रूपमा अशक्त तथा विपन्न बालबालिकाहरूको पहिचान, उपचार, शल्यक्रिया, फिजियोथेरापी, सहायक सामग्री वितरण तथा पुनर्स्थापना कार्यक्रम सञ्चालनमा उपयोग हुने बताइएको छ।

एक औपचारिक कार्यक्रमका बीच प्रभु बैंकका मार्केटिङ म्यानेजर सबिन सम्शेर राणा ले एचआरडीसीका प्रमुख प्रशासन अधिकृत प्रकाश कुमार यादव लाई उक्त रकमको चेक हस्तान्तरण गर्नुभएको थियो।

“विश्वास लिन्छौं, विश्वास दिन्छौं” भन्ने मूल नारासहित सेवा प्रदान गर्दै आएको प्रभु बैंकका देशभर ३०० शाखा कार्यालय, २६१ एटीएम तथा ६६ एक्सटेन्सन काउन्टरमार्फत करिब ३६ लाखभन्दा बढी ग्राहकलाई सेवा दिँदै आएको जनाएको छ।