काठमाडौं, २८ वैशाख २०८३  । नेपाल इन्भेष्टमेण्ट मेगा बैंक लिमिटेडले आफ्ना प्रमुख कार्यकारी अधिकृत श्री ज्योति प्रकाश पाण्डेको राजीनामासम्बन्धी केही सञ्चारमाध्यम तथा सामाजिक सञ्जालमा प्रकाशित एवं प्रसारित समाचारप्रति गम्भीर ध्यानाकर्षण भएको जनाएको छ।

बैंकले एक विज्ञप्ति जारी गर्दै उक्त समाचारहरू भ्रामक, आधारहीन तथा तथ्यहीन रहेको स्पष्ट पारेको छ। विज्ञप्तिमा प्रमुख कार्यकारी अधिकृत पाण्डे हाल पनि आफ्नो जिम्मेवारीमा सक्रिय रहँदै बैंकको कार्यसम्पादन तथा व्यवस्थापनमा संलग्न रहेको उल्लेख गरिएको छ।

बैंकले बैंकसम्बन्धी कुनै पनि सूचना वा समाचार प्रकाशन तथा प्रसारण गर्नुअघि आधिकारिक स्रोतबाट पुष्टि गर्न सम्पूर्ण सञ्चारमाध्यम तथा सरोकारवालासँग आग्रह गरेको छ।

साथै, नेपाल इन्भेष्टमेण्ट मेगा बैंकले ग्राहकवर्ग, शेयरधनी तथा आम सर्वसाधारणप्रतिको विश्वास र प्रतिबद्धतालाई अझ सुदृढ बनाउँदै गुणस्तरीय बैंकिङ सेवा प्रदान गर्न सदैव प्रतिबद्ध रहेको जनाएको छ।