काठमाडौं । डिजिटल भुक्तानी सेवा प्रदायक Khalti ले आफ्ना सम्पूर्ण केवाइसी प्रमाणित व्यक्तिगत प्रयोगकर्ताका लागि ‘सुपर वालेट’ सुविधा सार्वजनिक गरेको छ। ग्लोबल आइएमई बैंक लिमिटेडसँगको साझेदारीमा सुरु गरिएको यो सेवा नेपालमै पहिलो ‘सुपर वालेट’ तथा ‘नियो बैंकिङ’ अवधारणामा आधारित सुविधा भएको कम्पनीले जनाएको छ।

यसअघि सीमित प्रयोगकर्तामा मात्र उपलब्ध रहेको ब्याज सुविधा अब सबै योग्य प्रयोगकर्तामा विस्तार गरिएको हो। नयाँ व्यवस्थासँगै खल्ती वालेट अब केवल भुक्तानीको माध्यम मात्र नभई डिजिटल बचत उपकरणका रूपमा समेत प्रयोग गर्न सकिने भएको छ।

कम्पनीका अनुसार सुपर वालेटमा राखिएको मौज्दातमा वार्षिक २.७५ प्रतिशत ब्याज प्रदान गरिनेछ। ब्याजदर साझेदार बैंकको नीतिअनुसार परिवर्तन हुन सक्नेछ।

सुपर वालेटमा ब्याज गणना दैनिक आधारमा हुने र मासिक रूपमा स्वतः प्रयोगकर्ताको वालेटमा जम्मा हुने व्यवस्था गरिएको छ। प्रयोगकर्ताले कुनै पनि बैंकमा जानु नपर्ने र सम्पूर्ण प्रक्रिया खल्ती एपमार्फत नै सम्पन्न गर्न सकिने बताइएको छ।

यो सुविधा प्राप्त गर्न प्रयोगकर्ताको खाता केवाइसी प्रमाणित हुनुपर्नेछ। साथै, कम्तीमा १० वटा सफल कारोबार पूरा गरेको वा वालेटमा न्यूनतम १ हजार रुपैयाँको ओभरनाइट ब्यालेन्स कायम भएको हुनुपर्ने सर्त पनि राखिएको छ।

यो सुविधा केवल व्यक्तिगत खाताका लागि मात्र लागू हुने र पिओएस तथा मर्चेन्ट खाताहरू यसका लागि योग्य नहुने कम्पनीले स्पष्ट पारेको छ।