काठमाडौं, जेठ २४ – नेपालका लागि लिपमोटर (Leapmotor) गाडीको आधिकारिक वितरक साङ्ग्रिला मोटर्सले आफ्नो लोकप्रिय इलेक्ट्रिक एसयूभी लिपमोटर B10 को टप भेरियन्टको नयाँ मूल्य सार्वजनिक गरेको छ। नेपाल सरकारले हालै लागू गरेको नयाँ कर संरचनापछि कम्पनीले गाडीको मूल्यमा उल्लेखनीय कटौती गरेको हो।

यसअघि ६० लाख रुपैयाँमा बिक्री हुँदै आएको लिपमोटर B10 को टप भेरियन्ट अब ५४ लाख ९९ हजार रुपैयाँमा उपलब्ध हुने कम्पनीले जनाएको छ। नयाँ मूल्य सार्वजनिक भएसँगै ग्राहकले यस मोडलमा ५ लाख रुपैयाँसम्मको प्रत्यक्ष लाभ लिन सक्ने भएका छन्।

उत्तरढोकास्थित लिपमोटरको शोरुममा आयोजित विशेष कार्यक्रममा नयाँ मूल्य घोषणा गरिएको हो। कार्यक्रममा सञ्चारकर्मी, अटोमोबाइल क्षेत्रका प्रभावकारी व्यक्तित्व तथा ईभी पारखीहरूको उल्लेख्य सहभागिता रहेको थियो।

कार्यक्रममा बोल्दै साङ्ग्रिला मोटर्सका निर्देशक जय गोल्छाले नयाँ मूल्य निर्धारणले नेपाली उपभोक्तालाई गुणस्तरीय विद्युतीय सवारी सहज पहुँचमा उपलब्ध गराउने कम्पनीको प्रतिबद्धता झल्काएको बताउनुभयो। उहाँले परिष्कृत प्रविधि, उच्च सुरक्षा मापदण्ड र प्रतिस्पर्धी मूल्यका कारण लिपमोटर B10 नेपाली बजारमा आकर्षक विकल्प बन्ने विश्वास व्यक्त गर्नुभयो।

लिपमोटर B10 मा ६७.१ किलोवाट-आवर क्षमताको एलएफपी ब्याट्री र १६० किलोवाट क्षमताको मोटर जडान गरिएको छ। कम्पनीका अनुसार यो गाडीले एकपटक पूर्ण चार्ज गर्दा ६०० किलोमिटरसम्मको ड्राइभिङ रेन्ज प्रदान गर्छ।

सुरक्षाका दृष्टिले गाडीमा अत्याधुनिक एडास (ADAS) प्रणाली र युरो एनक्यापको ५-स्टार सुरक्षा रेटिङ रहेको छ। यसबाहेक स्न्यापड्रागन प्रोसेसरद्वारा सञ्चालित स्मार्ट ककपिट, फराकिलो इन्टेरियर तथा फास्ट चार्जिङ सुविधा यसका प्रमुख आकर्षण हुन्।

लिपमोटर विश्वव्यापी अटोमोबाइल समूह स्टेलान्टिसको रणनीतिक साझेदारीमा अघि बढिरहेको ईभी ब्रान्ड हो। स्टेलान्टिसअन्तर्गत मसेराटी, जिप, प्युजो लगायतका विश्वप्रसिद्ध ब्रान्डहरू आबद्ध छन्।

कम्पनीका अनुसार लिपमोटरले हालसम्म विश्वभर १० लाखभन्दा बढी सवारी बिक्री गरिसकेको छ। गत मे महिनामा मात्रै ब्रान्डले ३८ हजार ५६९ युनिट गाडी ग्राहकलाई हस्तान्तरण गरेको थियो। हाल ४० भन्दा बढी देशमा उपस्थिति रहेको कम्पनीसँग १,७०० भन्दा बढी बिक्री तथा सेवा केन्द्रहरूको नेटवर्क रहेको बताइएको छ।