काठमाडौं — ललितपुरस्थित ग्रीनवीच होटलका सञ्चालकले सामाजिक सञ्जालमार्फत सार्वजनिक गरेको भिडियोमा गरिएको क्षतिपूर्ति नपाएको दाबीप्रति समिट होटलले गम्भीर आपत्ति जनाएको छ। होटलले उक्त दाबी तथ्यहीन र भ्रामक रहेको भन्दै क्षतिपूर्तिस्वरूपर ९ करोड ६६ लाख रकम भुक्तानी गरिसकिएको जनाएको छ।

समिट होटलले सार्वजनिक गरेको जानकारीअनुसार ग्रीनवीच होटलका सञ्चालकले उक्त रकम बुझेको प्रमाणस्वरूप हस्ताक्षरसहितको रसिदसमेत उपलब्ध रहेको छ। होटलका अनुसार क्षतिपूर्ति रकम बुझिसकेपछि पनि नपाएको दाबी गर्दै सामाजिक सञ्जालमा सामग्री सार्वजनिक गर्नु शंकास्पद देखिएको छ।

होटलले यस विषयमा सम्बन्धित सरकारी निकायलाई जानकारी गराइसकेको जनाएको छ। समिट होटलका अनुसार केही समयअघि ललितपुर महानगरपालिकाले समेत ग्रीनवीच होटलका सञ्चालकसँग प्राप्त रु. ९ करोड ६६ लाख रकम कुन प्रयोजनमा खर्च गरिएको हो भन्नेबारे जानकारी मागेको थियो।

समिट होटलले ललितपुर महानगरपालिका–१, कुपण्डोलस्थित होटल तथा अपार्टमेन्ट निर्माणको प्रारम्भिक चरणमा २०७९ चैत २५ गते आसपासका सात घरधुरी तथा संधियारलाई पुगेको क्षतिलाई सम्बोधन गर्न सहमतिका आधारमा उचित क्षतिपूर्ति वितरण गरिएको जनाएको छ।

होटलका अनुसार ग्रीनवीच होटलका सञ्चालकले क्षतिपूर्तिवापतको रकम बुझिसकेपछि पनि आफूले कुनै रकम नपाएको दाबी गर्दै आमजनमानसमा भ्रम सिर्जना गर्ने उद्देश्यले तथ्यहीन सूचना प्रवाह गरिरहेका छन्।

‘सामाजिक सञ्जालमार्फत आधारहीन तथा भ्रामक सामग्री सार्वजनिक गरी सर्वसाधारणमा भ्रम सिर्जना गर्ने प्रयास भएकाले यसप्रति होटलको गम्भीर ध्यानाकर्षण भएको छ,’ समिट होटलद्वारा जारी विज्ञप्तिमा भनिएको छ, ‘सार्वजनिक गरिएका त्यस्ता सामग्रीमा कुनै सत्यता नरहेको स्पष्ट रूपमा खण्डन गर्दछौं।’

समिट होटलले सत्यतथ्यको आधारमा मात्रै सूचना सम्प्रेषण गर्न तथा भ्रमपूर्ण सामग्रीको पछि नलाग्न सर्वसाधारणलाई आग्रह गरेको छ।