काठमाडौँ। नेपाल टेलिकमले हाल सञ्चालन भइरहेको फिफा विश्वकप– २०२६ लाई लक्षित गर्दै आफ्ना एनटीटीभी ग्राहकहरूका लागि विशेष प्याकेज उपलब्ध गराएको छ। टेलिकमले यो प्याकेज खरिद गर्ने क्रममा वा प्रयोग गर्दा आउने जुनसुकै समस्या र गुनासोहरूलाई तत्काल सम्बोधन गर्नका लागि चौबीसै घण्टा सोधपुछ तथा ग्राहक सेवाको समेत व्यवस्था गरेको छ। प्याकेज खरिद वा सञ्चालनका क्रममा कुनै समस्या आएमा ग्राहकहरूले सिधै १९८ नम्बरमा सम्पर्क गरी आफ्नो गुनासो दर्ता गराउन सक्नेछन्। यसका साथै ग्राहकहरूको सहजताका लागि वैकल्पिक नम्बरका रूपमा ०१–५७२०१९१ समेत तोकिएको छ, जहाँ प्राप्त हुने गुनासोहरूलाई उच्च प्राथमिकतामा राखेर समाधान गरिने टेलिकमले जनाएको छ।

यस फिफा विश्वकप– २०२६ टीभी प्याकेज अन्तर्गत सम्पूर्ण एनटीटीभी ग्राहकहरूले मात्र ९९९ रुपैयाँमा प्याकेज खरिद गरी विश्वकपा रोमाञ्चक खेलहरूको प्रत्यक्ष प्रसारण हेर्न सक्नेछन्। प्याकेज सुचारु गर्नका लागि ग्राहकहरूले आफ्नो टेलिभिजन सेटमा ुहिमालय स्पोर्ट्सु च्यानल छनोट गर्नुपर्नेछ। च्यानल छनोट गर्नासाथ स्क्रिनमा एउटा छुट्टै इन्ट्री स्क्रिन देखा पर्नेछ, जहाँ नेपाल टेलिकमको प्रिपेड वा पोस्टपेड मोबाइल नम्बर राखेपछि एउटा ओटीपी कोड प्राप्त हुनेछ। उक्त ओटीपी कोडलाई टीभी स्क्रिनमा प्रविष्ट गरेपछि ग्राहकको मोबाइल ब्यालेन्सबाट स्वतः ९९९ रुपैयाँ काटिनेछ र प्याकेज तुरुन्तै सुचारु हुनेछ। यसका साथै ग्राहकहरूले आफ्नो नजिकैको नेपाल टेलिकमको ग्राहक सेवा केन्द्रमा गएर पनि यो प्याकेज सक्रिय गराउन सक्नेछन्।

नेपाल टेलिकमले आफ्ना उच्च गतिको इन्टरनेट प्रयोगकर्ताहरूका लागि यो प्याकेजमा विशेष बोनसको समेत व्यवस्था गरेको छ। वार्षिक १०० वा सोभन्दा बढी गतिको प्याकेज नयाँ जडान गर्ने, नवीकरण गर्ने वा १०० भन्दा मुनिको प्याकेजबाट १०० वा सोभन्दा माथिको प्याकेजमा अपग्रेड हुने ग्राहकहरूले फिफा विश्वकप– २०२६ टीभी प्याकेज बोनसका रूपमा पूर्ण रूपमा निःशुल्क प्राप्त गर्नेछन्। उक्त बोनस प्याकेज प्राप्त गर्नका लागि ग्राहकले आफ्नो मोबाइलबाट १४१६ डायल गरी त्यसपछि ४ नम्बर छनोट गरेर प्राप्त निर्देशन अनुसार आफ्नो सेटअप बक्सको म्याक एड्रेस उपलब्ध गराउनुपर्ने नेपाल टेलिकमका प्रवक्ता डा कमल लामिछाने बताउँछन् ।