काठमाडौं । दुईदिन अघिबाट लगातार भइरहेको भारी वर्षा र खराब मौसमको कारण नेपाल शैक्षिक परामर्श संघ (इक्यान)ले गर्ने भनिएको शैक्षिक मेला स्थगित भएको छ ।

यही असोज १३ गते (२९ सेप्टेम्बर २०२४) आइतबारका दिन द एभरेस्ट होटल, नयाँ बानेश्वरमा सञ्चालन गर्ने तयारी गरिएको १५ औं इक्यान शैक्षिक मेला निरन्तरको वर्षा र खराब मौसमका कारण स्थगित गर्नुपरेको इक्यान सचिवालयले जनाएको छ ।

प्रतिकुल परिस्थितिका कारण मेला स्थगित गर्नुपरेकोमा दुःख व्यक्त गर्दै मौसम सुधार नभएसम्म शैक्षिक मेला सञ्चालन नहुने इक्यान सचिवालयले प्रस्ट पारेको छ । मौसममा सुधार आएर अर्को मिति तय भएपछि सम्बन्धीत सबैलाई जानकारी हुने इक्यान सचिवालयले जनाएको छ ।

मेला आयोजनाको सम्पूर्ण तयारी पुरा भएपनि मौसमले साथ नदिएका कारण स्थगित गर्नुपरेको इक्यानका कोषाध्यक्ष आशिक कार्कीले बताए । ‘यस्तो प्रतिकुल अवस्थामा मेला सञ्चालन गर्नु विद्यार्थी, अभिभावक, र शैक्षिक संस्थाहरुको उपस्थितमा चुनौतीपूर्ण देखिएकाले मौसम सुधार भएपछि नै मेला सञ्चालन गर्ने निर्णय गरेका छौं,’ उनले भने ।

मेलामा सहभागि हुने शैक्षिाक संस्थालगायत सम्बन्धित सबैलाई इमेलमार्फत मेला स्थगित भएको जानकारी गराइसकेको इक्यान सचिवालयले जनाएको छ ।