काठमाडौँ । सन नेपाल लाइफ इन्स्योरेन्सले बैंककमा आयोजित ICC २०२४ एशिया इन्स्योरेन्स कार्यक्रममा तीन प्रतिष्ठित अन्तर्राष्ट्रिय अवार्ड जित्न सफल भएको छ। यसले कम्पनीको व्यावसायिक उत्कृष्टता र नेतृत्वलाई अन्तर्राष्ट्रिय स्तरमा मान्यता दिलाएको छ।

कम्पनीले “उत्कृष्ट जोखिम व्यवस्थापन रणनीति,” “बीमा क्षेत्रमा महिला नेतृत्व,” र “उत्कृष्ट ग्राहकमैत्री जीवन बीमा सेवा” गरी तीन विधामा उच्च सम्मान प्राप्त गरेको छ। यसले सन नेपाल लाइफले आफ्नो नवीन रणनीति, समावेशी नेतृत्व, र ग्राहक केन्द्रित सेवामा उच्च मानक स्थापित गरेको प्रमाणित गर्दछ।

बैंककमा आयोजित विशेष कार्यक्रममा कम्पनीका प्रमुख कार्यकारी अधिकृत श्री राज कुमार अर्यालले उक्त अवार्डहरू ग्रहण गर्नुभएको थियो। उनले यस उपलब्धिले नेपालको बीमा क्षेत्रलाई अन्तर्राष्ट्रिय पहिचान दिलाउनुका साथै ग्राहकहरूको विश्वासलाई अझ बढाउने बताए।

सन नेपाल लाइफ इन्स्योरेन्सले नेपालभर १३९ शाखा तथा उपशाखा कार्यालयहरू मार्फत ग्राहकहरूलाई जीवन बीमा सेवा प्रदान गर्दै आफ्ना ग्राहकहरूको वित्तीय सुरक्षामा निरन्तर समर्पित छ। यस उपलब्धिले कम्पनीको अग्रगामी भूमिका र गुणस्तरीय सेवा प्रदान गर्ने प्रतिबद्धतालाई पुष्टि गर्दछ।