काठमाडौं । हालै सम्पन्न जेन–जी आन्दोलनका क्रममा भएका भौतिक तथा अन्य क्षतिका कारण निर्जीवन बीमा कम्पनीहरूमा परेका कूल ३ हजार ३१६ वटा बीमा दाबीमध्ये हालसम्म अग्रिम भुक्तानीसहित करिब रु. ५ अर्ब ४८ करोड २५ लाख दाबी रकम बीमितहरूलाई भुक्तानी गरिएको छ।

बीमा कम्पनीहरूबाट प्राप्त अद्यावधिक तथ्याङ्कअनुसार कूल दाबी रकम करिब रु. २३ अर्ब ४७ करोड रहेको छ। प्राधिकरणमा १४ वटा निर्जीवन बीमा कम्पनी र ४ वटा लघु निर्जीवन बीमा कम्पनीहरूबाट प्राप्त विवरणअनुसार भुक्तानी प्रक्रिया निरन्तर रूपमा अघि बढिरहेको जनाइएको छ।

तथ्याङ्कअनुसार सम्पत्ति बीमातर्फ कूल ७१२ वटा दाबीबाट करिब रु. १९ अर्ब ५ करोडको दाबी परेकोमा हालसम्म करिब रु. ३ अर्ब ९३ करोड ५९ लाख भुक्तानी गरिएको छ। त्यसैगरी मोटर बीमातर्फ २ हजार ३२१ वटा दाबीबाट करिब रु. ३ अर्ब ४६ करोड १६ लाखको दाबी रकममध्ये करिब रु. १ अर्ब ३९ करोड २५ लाख भुक्तानी भएको छ।

यसैगरी, इञ्जिनीयरिङ तथा ठेक्का जोखिम बीमातर्फ २२६ वटा दाबीबाट करिब रु. ५५ करोड ३९ लाखको दाबीमध्ये करिब रु. ८ करोड ३६ लाख, परिवहन बीमातर्फ १२ वटा दाबीबाट करिब रु. १ करोड ६९ लाखमध्ये करिब रु. १ करोड ५५ लाख, तथा अन्य बीमातर्फ ४५ वटा दाबीबाट करिब रु. ३८ करोड ४० लाखमध्ये करिब रु. ५ करोड अग्रिम भुक्तानीसहित भुक्तानी गरिएको छ।

पुनर्बीमा दाबीमा करिब ३ अर्ब रुपैयाँ भुक्तानी

जेन–जी आन्दोलनका क्रममा भएका क्षतिको बीमा दाबी भुक्तानीका लागि नेपाल पुनर्बीमा कम्पनी लिमिटेडले निर्जीवन बीमा कम्पनीहरूलाई अग्रिम भुक्तानीसहित करिब रु. ३ अर्ब २ करोड पुनर्बीमा दाबी भुक्तानी गरेको छ।

नेपाल पुनर्बीमा कम्पनीमा १४ वटा निर्जीवन बीमा कम्पनीहरूबाट कूल २ हजार ८६३ वटा पुनर्बीमा दाबी परेका छन्, जसको कूल पुनर्बीमा दाबी रकम करिब रु. १६ अर्ब ६२ करोड ६६ लाख रहेको अद्यावधिक तथ्याङ्कमा उल्लेख गरिएको छ।