काठमाडौं।सिद्धार्थ प्रिमियर इन्स्यारेन्सले २५ प्रतिशत नगद लाभांश सम्बन्धित शेयरधनीको बैंक खातामा जम्मा गरिएको जनाएको छ। कम्पनीले पुस २९ गते सम्पन्न ३२औँ वार्षिक साधारणसभा बाट पारित गरेको लाभांश करसहित वितरण हुने प्रस्तावको आधारमा उक्त रकम एनएमबि क्यापिटल लिमिटेड, बालुवाटार, काठमाडौं मार्फत शेयरधनीको हितग्राही खातामा उपलब्ध गराएको हो।

साधारणसभा प्रयोजनका लागि शेयर दाखिला बन्द हुने मितिसम्म कायम रहेका शेयरधनीहरूको हितग्राही खातामा बैंक विवरण अद्यावधिक भएको खण्डमा नगद लाभांश सोही खातामा जम्मा गरिएको छ।

कम्पनीले जनाए अनुसार, यदि कुनै शेयरधनीहरूले अझै अभौतिकीकरण नगरेका छन् वा हितग्राही खातामा बैंक विवरण अद्यावधिक छैन, भने यथाशक्य छिटो अभौतिकीकरण गरी बैंक विवरण अद्यावधिक गरेपछि नगद लाभांश सोही खातामा जम्मा गरिने व्यवस्था रहेको छ।

अभौतिकीकरण गरिसकेका तर हितग्राही खातामा बैंक विवरण अद्यावधिक नगरेका शेयरधनीहरूले पनि छिटो विवरण अद्यावधिक गर्नुपर्ने र सोही अनुसार नगद लाभांश क्रमशः बैंक खातामा जम्मा गरिने कम्पनीले जनाएको छ।

बैंक खातामा लाभांश जम्मा गर्दा लागू हुने कुनै शुल्क भएमा सो शुल्क शेयरधनीले व्यहोर्नेछन्। साथै, शेयर दाखिला खारेजी बन्द हुने मितिसम्म मर्जर पश्चात् बैंक/वित्तीय संस्थाको खाता नं परिवर्तन भएमा लाभांश रकम फिर्ता आउन सक्ने हुँदा कम्पनीले यथासम्भव छिटो नयाँ खाता नं अद्यावधिक गर्न शेयरधनीलाई आग्रह गरेको छ।