काठमाडौं । नेपाल इन्भेष्टमेण्ट मेगा बैंक लिमिटेडले चालू आर्थिक वर्षको दोस्रो त्रैमाससम्म १ अर्ब ६१ करोड ३० लाख रुपैयाँ खुद नाफा कमाएको छ। गत आवको सोही अवधिमा बैंकले २ अर्ब ८३ करोड २३ लाख रुपैयाँ नाफा कमाएको थियो, जसले ४३ प्रतिशतको गिरावट देखाउँछ।

बैंकले नाफा घट्ने मुख्य कारणका रूपमा कर्जाको मागमा कमी, छोटो अवधिमा ब्याजदर परिवर्तन, जेनजी आन्दोलनपछिको राजनैतिक अस्थिरता र आर्थिक अनिश्चिततालाई बताएका छन्।

चालू त्रैमाससम्म बैंकको खुद ब्याज आम्दानी १२.८३ प्रतिशतले घटेर ६ अर्ब ४२ करोड ३ लाख रुपैयाँमा पुगेको छ भने कुल सञ्चालन आम्दानी ८ अर्ब ५८ करोड ४८ लाख रुपैयाँमा सीमित भएको छ। सञ्चालन नाफा पनि घटेर २ अर्ब ३३ करोड ८७ लाख रुपैयाँ पुगेको छ, जसले प्रतिशेयर आम्दानी १६.६० रुपैयाँबाट घटेर ९.४५ रुपैयाँ बनाएको छ।

त्यसैगरी, खराब कर्जा (एनपीएल) ५.८६ प्रतिशतबाट बढेर ७.९० प्रतिशत पुगेको छ। बैंकको चुक्ता पूँजी ३४ अर्ब १२ करोड ८५ लाख रुपैयाँ, जगेडा कोष ऋणात्मक ३ अर्ब ६१ करोड १० लाख र रिजर्भ कोष ३५ अर्ब ९६ करोड ३१ लाख रुपैयाँ रहेको छ। बैंकले ३ खर्ब २८ अर्ब १६ करोड रुपैयाँ कर्जा प्रवाह गरी ५ खर्ब १९ अर्ब १० करोड रुपैयाँ निक्षेप संकलन गरेको छ।