काठमाडौँ। नेपाल उद्योग परिसंघले महिला उद्यमी महासंघ नेपालका नवनिर्वाचित अध्यक्ष र कार्यकारी समिति सदस्यहरुलाई बधाईसहित स्वागत गरेको छ।

स्वागत समारोहमा परिसंघका अध्यक्ष वीरेन्द्रराज पाण्डेले नवनिर्वाचित पदाधिकारीहरूसँग समग्र आर्थिक विकासमा सहकार्य गर्नुपर्ने आवश्यकता औँल्याए। अध्यक्ष पाण्डेले स्वदेशी उत्पादनको उपभोग बढाउनुपर्नेमा जोड दिँदै ‘मेक इन नेपाल स्वदेशी’ अभियान संचालन भइरहेको जानकारी दिए। उनले परिसंघ र महिला उद्यमी महासंघबीच गहन सहकार्य हुने विश्वास व्यक्त गर्नुभयो।

महासंघकी नवनिर्वाचित अध्यक्ष दर्शना श्रेष्ठले महिला उद्यमशीलताको विकासका लागि परिसंघसँग सहकार्य आवश्यक रहेको बताइन्। कार्यक्रममा महासंघ र परिसंघबीच सहकार्यका क्षेत्रलगायत विभिन्न विषयमा छलफल भएको थियो।

कार्यक्रममा परिसंघका उपाध्यक्ष अमित मोर, महानिर्देशक डा. घनश्याम ओझा लगायतका पदाधिकारीहरूको पनि उपस्थिति रहेको थियो।