काठमाडौं । NADA Automobiles Association of Nepal (नाडा) को हालै सम्पन्न निर्वाचनसम्बन्धी दायर रिट निवेदन पाटन उच्च अदालतले खारेज गरेको छ। अदालतको निर्णयसँगै नाडामा रहेका सबै कानुनी विवाद समाप्त भएका छन् र नव–निर्वाचित कार्यसमितिले अब कार्यभार सम्हाल्ने अवस्था बनेको छ।

संस्थाले अदालतमा विचाराधिन अवस्थामा नव–निर्वाचित कार्यसमितिको शपथग्रहण अस्थायी रूपमा स्थगित गरेको थियो। तर अदालतको निर्णयपछि शपथग्रहण कार्यक्रम अगाडि बढ्न सक्ने भएको छ।

नाडाले आफ्नो विधान, विधि तथा स्थापित प्रक्रियाअनुसार निकट भविष्यमा नव–निर्वाचित कार्यसमितिको औपचारिक शपथग्रहण सम्पन्न गरिने जानकारी दिएको छ। अदालतको निर्णयले संस्थालाई थप स्थिरता र एकताका साथ अघि बढ्न सहयोग गर्ने विश्वास व्यक्त गरिएको छ।

नाडाले सम्पूर्ण सदस्य, सरोकारवाला निकाय र साझेदार संस्थासँग सहकार्य गर्दै नेपालको अटोमोबाइल क्षेत्रको दिगो विकास, नीतिगत संवाद र उद्योगमैत्री वातावरण सुदृढीकरणका लागि निरन्तर सक्रिय रहने प्रतिबद्धता व्यक्त गरेको छ।

नाडा सम्बन्धमा:
NADA Automobiles Association of Nepal नेपालको अटोमोबाइल क्षेत्रको प्रतिनिधित्व गर्ने अग्रणी छाता संस्था हो। करिब पाँच दशकदेखि नाडाले अटोमोबाइल उद्योगको विकास, प्रवर्द्धन, नीतिगत सहकार्य र सरोकारवालाबीच समन्वयात्मक भूमिका निर्वाह गर्दै आएको छ।