काठमाडौं ।पारामाउन्ट मोटर्स ले नेपाली बजारमा नयाँ मिडसाइज इलेक्ट्रिक एसयूभी एमजी एस६ सार्वजनिक गर्ने तयारी गरेको छ। कम्पनीका अनुसार आगामी एक महिनाभित्रै देशभर रहेका एमजीका १४ शोरुममार्फत यसको बुकिङ र बिक्री प्रक्रिया सुरु गरिनेछ।

गत वर्षदेखि बजारमा उपलब्ध एमजी एस५ को सफलतापछि कम्पनीले अझ ठूलो, शक्तिशाली र आधुनिक प्रविधियुक्त नयाँ मोडल ल्याउन लागेको हो। नेपाली बजारमा इलेक्ट्रिक गाडीप्रति बढ्दो आकर्षणका बीच एमजीले आफ्नो उपस्थितिलाई थप मजबुत बनाउन यो नयाँ एसयूभी सार्वजनिक गर्न लागेको जनाएको छ।

कम्पनीका मार्केटिङ प्रमुख सन्दीप शर्माका अनुसार, प्रिमियम फिचर, लामो दूरी यात्रा क्षमता र पारिवारिक प्रयोगलाई ध्यानमा राखेर यो गाडी डिजाइन गरिएको हो। उनले भने, “नयाँ एमजी एस६ नेपाली ग्राहकका लागि सुविधा, प्रविधि र प्रदर्शनको सन्तुलित विकल्प बन्नेछ।”

शक्तिशाली प्रदर्शन र लामो रेन्ज

एमजी एस६ मा १८० किलोवाटको शक्तिशाली मोटर र ७७ किलोवाट आवरको ब्याट्री प्याक जडान गरिएको छ। यसले १४४ किलोवाटसम्मको डीसी फास्ट चार्जिङ सपोर्ट गर्नेछ, जसले छोटो समयमा चार्ज गर्न सहज बनाउँछ।

रियर ह्विल ड्राइभ सिस्टमसहितको यो गाडीले २४४ हर्सपावर र ३५० एनएम टर्क उत्पादन गर्ने क्षमता राख्छ। कम्पनीका अनुसार, एकपटक फुल चार्जमा करिब ५२९ किलोमिटरसम्म यात्रा गर्न सकिनेछ, जुन डब्लुएलटीपी मापदण्डअनुसार परीक्षण गरिएको हो।

आधुनिक डिजाइन र प्रविधि

एमजी एस६ एमजीको मोड्युलर स्केलेबल प्लेटफर्ममा आधारित छ, जसमा एमजी४ ईभी पनि निर्माण गरिएको छ। गाडीको बाहिरी डिजाइन निकै आक्रामक र आकर्षक बनाइएको छ, जसमा एंगुलर हेडल्याम्प, आकर्षक फ्रन्ट फेसिया र पछाडि पूर्ण चौडाइको एलईडी लाइट बार समावेश छन्।

इन्टेरियरतर्फ, प्रविधि र आरामदायी सुविधाको उत्कृष्ट संयोजन प्रस्तुत गरिएको छ। यसमा १२.८ इन्चको ठूलो इन्फोटेनमेन्ट स्क्रिन, १०.२५ इन्चको डिजिटल ड्राइभर डिस्प्ले, र आधुनिक टच इन्टरफेस उपलब्ध छन्। यद्यपि, प्रयोगकर्ताको सहजताका लागि आवश्यक फिजिकल कन्ट्रोलहरू पनि राखिएको छ।

आराम, स्पेस र सुविधा

गाडीभित्र अगाडिका सिटहरूमा हिटेड र भेन्टिलेटेड सुविधा दिइएको छ भने पछाडिका सिटहरूमा पनि हिटेड सुविधा उपलब्ध छ। यसले लामो यात्रामा यात्रुहरूको आराम सुनिश्चित गर्नेछ।

स्पेसका हिसाबले, ६७४ लिटरको बुट स्पेस उपलब्ध छ, जसलाई पछाडिका सिट फोल्ड गर्दा १,९१० लिटरसम्म विस्तार गर्न सकिन्छ। साथै, अगाडिको भागमा १२४ लिटरको फ्रन्ट ट्रंक (फ्रंक) पनि दिइएको छ, जुन साना सामान राख्न उपयोगी हुन्छ।

सुरक्षा र अन्य फिचर

सुरक्षाको दृष्टिकोणले यो गाडीले पाँच-स्टार युरो एनक्याप रेटिङ प्राप्त गरेको छ। यसबाहेक, एप्पल कारप्ले र एन्ड्रोइड अटो सपोर्ट, ११ स्पिकर प्रिमियम अडियो सिस्टम, प्यानोरामिक सनरुफ, वायरलेस चार्जिङ, तथा युट्युब जस्ता इन–बिल्ट एपहरू पनि समावेश छन्।

बजार प्रतिस्पर्धा

एमजी एस६ नेपाली बजारमा पहिलेदेखि उपलब्ध बीवाईडी सिलायन ७, दिपल एस ०७ र लिपमोटर सी१० जस्ता मिडसाइज इलेक्ट्रिक एसयूभीसँग प्रतिस्पर्धामा उत्रिनेछ।

नयाँ मोडलको आगमनसँगै नेपालमा इलेक्ट्रिक एसयूभी सेग्मेन्ट अझ प्रतिस्पर्धात्मक र उपभोक्तामैत्री बन्ने अपेक्षा गरिएको छ। कम्पनीले यसको मूल्य र उपलब्धताको विस्तृत जानकारी सार्वजनिक गर्ने तयारी गरिरहेको जनाएको छ।