काठमाडौं । नेपाल भलिबल संघले आगामी काभा महिला भलिबल च्याम्पियनसिप लिग–२०८३ को ट्रफी अनावरण गरेको छ । संघले आइतबार पत्रकार भेटघाट कार्यक्रममार्फत प्रतियोगिताको तयारी, सहभागिता र व्यवस्थापनबारे जानकारी गराएको हो ।

नेपाल भलिबल संघका अनुसार प्रतियोगिता आगामी जेठ ८ देखि १५ गतेसम्म काठमाडौंमा आयोजना हुनेछ । राष्ट्रिय खेल भलिबलको विकास र विस्तारलाई लक्षित गर्दै नेपालले विगतदेखि नै विभिन्न राष्ट्रिय तथा अन्तर्राष्ट्रिय प्रतियोगिता आयोजना गर्दै आएको संघले जनाएको छ ।

यस पटकको प्रतियोगितामा इरान, किर्गिस्तान, भारत, श्रीलंका, बङ्गलादेश, मालदिभ्स, कजाकिस्तान र नेपाल सहित आठ राष्ट्रको सहभागिता सुनिश्चित भइसकेको छ ।

संघका अनुसार यो प्रतियोगिता विश्व वरियतासँग सम्बन्धित भएकाले नेपालले राम्रो प्रदर्शन गर्न सकेमा राष्ट्रिय महिला भलिबल टोलीको वरियता सुधार हुने अपेक्षा गरिएको छ ।

प्रतियोगिताको प्रत्यक्ष प्रसारणको अधिकार हिमालय स्पोट्र्सले प्राप्त गरेको छ । संघले प्रतियोगिताको अधिकांश तयारी पूरा भइसकेको र बाँकी कामहरू निर्धारित समयभित्र सम्पन्न गरिने जानकारी दिएको छ ।

आयोजनाका लागि करिब २ करोड ५० लाख रुपैयाँ खर्च अनुमान गरिएको छ । नेपाल सरकारबाट एक करोड र काठमाडौं महानगरपालिकाबाट ३० लाख बजेट सहयोग प्राप्त भएकोमा संघले आभार व्यक्त गरेको छ ।

पत्रकार सम्मेलनमा नेपाल भलिबल संघले अन्तर्राष्ट्रिय स्तरको यो प्रतियोगितालाई सफल बनाउन सञ्चारमाध्यमको महत्वपूर्ण भूमिका रहने उल्लेख गर्दै व्यापक प्रचार–प्रसारमा सहयोग गर्न आग्रह गरेको छ ।

संघले ‘सहयोग र सहकार्यको लागि धन्यवाद’ भन्दै प्रतियोगितालाई सफल बनाउन सबै पक्षसँग सहकार्यको अपेक्षा व्यक्त गरेको छ ।