काठमाडौं । हुलास फिन सर्भ हायर पर्चेज लिमिटेड (साबिक हुलास फिन सर्भ लिमिटेड) ले चालु आर्थिक वर्ष २०८२/८३ को तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ। विवरणअनुसार कम्पनीले उल्लेखनीय व्यवसायिक विस्तार र कर्जा असुलीमा सुधारका कारण नाफा तथा कर्जा लगानी दुवै क्षेत्रमा उच्च वृद्धि हासिल गरेको छ।

कम्पनीले समीक्षा अवधिसम्म २४ करोड १३ लाख ४२ हजार रुपैयाँ (रु. २४१.३४ मिलियन) खुद नाफा आर्जन गरेको जनाएको छ, जुन गत वर्षको सोही अवधिको तुलनामा ६५.३५ प्रतिशतले बढी हो।

त्यसैगरी, कम्पनीको कुल कर्जा पोर्टफोलियो ११.२८ अर्ब रुपैयाँ पुगेको छ। यो व्यवसायिक विस्तारको हिसाबले ७५.१० प्रतिशतको वृद्धि हो।
कम्पनीका अनुसार प्रभावकारी रिकभरी व्यवस्थापनका कारण निष्क्रिय कर्जा (एनपीएल) अनुपात ४.२२ प्रतिशतबाट घटेर २.९४ प्रतिशतमा झरेको छ।

कर्जा लगानी बढिरहे पनि सम्पत्ति गुणस्तरमा सुधार हुनु कम्पनीको वित्तीय व्यवस्थापनको सकारात्मक संकेत भएको कम्पनीले जनाएको छ।

कम्पनीले आगामी दिनमा पनि सन्तुलित र दिगो व्यवसायिक वृद्धि, प्रभावकारी जोखिम व्यवस्थापन, कर्जा असुली सुदृढीकरण तथा सरोकारवालाको दीर्घकालीन हितलाई प्राथमिकतामा राख्ने प्रतिबद्धता व्यक्त गरेको छ।