पाल्पा । सहकारी संस्थाको संस्थागत संरक्षण, निर्जीवन बीमा सचेतना तथा सुशासनसम्बन्धी कार्यक्रम पाल्पाको तानसेनमा सम्पन्न भएको छ । जिल्ला सहकारी संघ पाल्पाको आयोजना तथा सगरमाथा लुम्बिनी इन्स्योरेन्स को सहकार्यमा आयोजित कार्यक्रममा जिल्लाभरिका सहकारी संस्थाका सञ्चालक समितिका अध्यक्ष, सदस्य तथा व्यवस्थापकहरूको सहभागिता रहेको थियो ।

कार्यक्रमका प्रमुख अतिथि तथा सगरमाथा लुम्बिनी इन्स्योरेन्सका प्रमुख कार्यकारी अधिकृत चंकी क्षेत्री ले सहकारीका शेयर सदस्यको बचत सुरक्षणका लागि बीमा आवश्यक रहेको बताउनुभयो ।

उहाँले सहकारी परिसर, बजारबाट संकलन गरिएको रकम तथा सहकारी कार्यालयबाट बैंकसम्म रकम लैजाँदा हुने लुटपाट वा हराउने जोखिमलाई ध्यानमा राखेर बीमा गर्न सकिने जानकारी दिनुभयो ।

कार्यक्रममा सगरमाथा लुम्बिनी इन्स्योरेन्सका लुम्बिनी प्रमुख विश्वदीप नेपाल ले सहकारीको रकम संरक्षणका उपायबारे सहजीकरण गर्नुभएको थियो । उहाँले रात्रिबासका क्रममा हुने जोखिम, कार्यालय तोडफोड गरेर नगद चोरी गर्ने, धम्की दिएर रकम कब्जा गर्ने लगायतका घटनाबाट हुन सक्ने क्षतिको सुरक्षणका लागि बीमा आवश्यक रहेको बताउनुभयो ।

त्यसैगरी, सगरमाथा लुम्बिनी इन्स्योरेन्स तानसेन शाखा प्रमुख करुणा काफ्ले तथा रामपुर शाखा प्रमुख डोल प्रसाद श्रेष्ठ ले कृषि, पशुपन्छी तथा जडीबुटी बीमासम्बन्धी विषयमा सहजीकरण गर्नुभएको थियो ।

भूपति पाण्डे को अध्यक्षतामा सम्पन्न कार्यक्रममा जिल्लाका विभिन्न सहकारी संस्थाका पदाधिकारी तथा व्यवस्थापकहरूको उल्लेख्य सहभागिता रहेको थियो । कार्यक्रममा संघका उपाध्यक्ष कृष्णप्रसाद भुसाल ले स्वागत मन्तव्य राख्नुभएको थियो भने सञ्चालन सचिव कृष्ण भट्टराईले गर्नुभएको थियो ।