काठमाडौं । नेपालको अग्रणी प्रिमियम इलेक्ट्रिक स्कुटर ब्रान्ड ‘एथर’ले वीरगञ्जमा आफ्नो नयाँ ‘एथर एक्सपिरियन्स सेन्टर’ सञ्चालनमा ल्याएको छ। यससँगै कम्पनीले देशभर स्मार्ट तथा दिगो विद्युतीय यातायातको पहुँच विस्तार गर्ने अभियानलाई थप मजबुत बनाएको जनाएको छ।

वीरगञ्जको आदर्शनगरमा स्थापना गरिएको उक्त एक्सपिरियन्स सेन्टर असार ४ गतेदेखि गेटवे मोटर्स प्रालिको व्यवस्थापनमा सञ्चालनमा आएको हो। नयाँ केन्द्रमार्फत मधेश प्रदेशका ग्राहकहरूले एथरका आधुनिक, प्रविधिमैत्री तथा उच्च प्रदर्शनयुक्त विद्युतीय स्कुटरहरू प्रत्यक्ष अवलोकन तथा अनुभव गर्न सक्नेछन्।

नयाँ केन्द्र सञ्चालनसँगै एथर नेपालको देशभर रहेका एक्सपिरियन्स सेन्टरको संख्या १२ पुगेको छ। हाल काठमाडौं उपत्यकामा पाँच केन्द्रसहित पोखरा, चितवन, इटहरी, बुटवल, जनकपुर, बिर्तामोड र वीरगञ्जमा कम्पनीका एक्सपिरियन्स सेन्टर सञ्चालनमा छन्।

कम्पनीले ग्राहकलाई उत्कृष्ट बिक्रीपछिको सेवा प्रदान गर्ने उद्देश्यले देशभर १० वटा अधिकृत सर्भिस सेन्टरको सञ्जाल विस्तार गरिरहेको जनाएको छ। यसले एथर प्रयोगकर्ताहरूलाई सहज, भरपर्दो र सन्तोषजनक स्वामित्व अनुभव उपलब्ध गराउने अपेक्षा गरिएको छ।

एथरले आफ्ना ग्राहकहरूलाई उद्योगकै उत्कृष्ट सुविधामध्ये एक मानिने आठ वर्षसम्मको विस्तारित ब्याट्री वारेन्टी उपलब्ध गराउँदै आएको छ, जसले दीर्घकालीन विश्वसनीयता र आत्मविश्वास प्रदान गर्ने कम्पनीको दाबी छ।

वीरगञ्जस्थित नयाँ एक्सपिरियन्स सेन्टरमा एथरको सम्पूर्ण स्कुटर दायरा उपलब्ध हुनेछ। यसअन्तर्गत प्रदर्शनमा केन्द्रित ‘एथर ४५० सिरिज’ तथा परिवारमैत्री ‘एथर रिज्टा’ प्रमुख मोडलका रूपमा रहेका छन्।

‘एथर ४५० सिरिज’ उत्कृष्ट प्रदर्शन, स्मार्ट प्रविधि र रोमाञ्चक राइडिङ अनुभव चाहने ग्राहकलाई लक्षित गरी विकास गरिएको स्कुटर हो। यसमा गुगल म्याप्समा आधारित नेभिगेसन, अटोहोल्ड, फल सेफ, रिभर्स मोड, विभिन्न राइड मोड तथा रेस्पोन्सिभ टचस्क्रिन ड्यासबोर्डजस्ता अत्याधुनिक सुविधाहरू समावेश छन्।

त्यस्तै, ‘एथर रिज्टा’ आधुनिक परिवार र दैनिक प्रयोगलाई ध्यानमा राखेर डिजाइन गरिएको स्कुटर हो। यसमा फराकिलो सिट, ठूलो अन्डर-सिट स्टोरेज, ट्र्याक्सन कन्ट्रोल, टो तथा थेफ्ट अलर्ट, ड्यासबोर्डमै व्हाट्सएप नोटिफिकेसन तथा आरामदायी बडी पोस्चरजस्ता सुविधाहरू उपलब्ध छन्।

नयाँ केन्द्रमा पुग्ने ग्राहकहरूले एथरका सम्पूर्ण विद्युतीय स्कुटरहरूको अवलोकन गर्न, प्रत्यक्ष उत्पादन अनुभव लिन, टेस्ट राइड गर्न, स्मार्ट तथा कनेक्टेड प्रविधिबारे जानकारी प्राप्त गर्न तथा आकर्षक फाइनान्सिङ र एक्सचेन्ज योजनाबारे बुझ्न सक्नेछन्।

ग्राहकहरूको सहज स्वामित्व अनुभव सुनिश्चित गर्न कम्पनीले वीरगञ्ज क्षेत्रमा समर्पित सेवा सहायता व्यवस्था समेत विस्तार गरेको जनाएको छ। प्रशिक्षित प्राविधिक, जेन्युइन स्पेयर पार्ट्स तथा समयमै मर्मत–सम्भार सेवामार्फत भरपर्दो सेवा उपलब्ध गराइने कम्पनीको भनाइ छ।

नेपालमा विद्युतीय सवारीसाधनको पूर्वाधार सुदृढ बनाउने उद्देश्यले एथर नेपालले आफ्नो ‘एथर ग्रिड फास्ट चार्जिङ नेटवर्क’ पनि तीव्र गतिमा विस्तार गरिरहेको छ। हाल देशका प्रमुख सहर तथा राजमार्गहरूमा ४० भन्दा बढी एथर ग्रिड चार्जिङ प्वाइन्ट सञ्चालनमा रहेको कम्पनीले जनाएको छ।

कम्पनीका अनुसार वीरगञ्ज एक्सपिरियन्स सेन्टरको उद्घाटनले देशव्यापी पहुँच विस्तार गर्ने दीर्घकालीन योजनालाई थप मजबुत बनाएको छ। नवीन प्रविधि, गुणस्तरीय उत्पादन तथा ग्राहक–केन्द्रित सेवामार्फत नेपालभर प्रिमियम विद्युतीय गतिशीलतालाई सहज र सुलभ बनाउने लक्ष्य कम्पनीको रहेको छ।

यसैबीच, नयाँ एक्सपिरियन्स सेन्टर उद्घाटनको अवसरमा एथर नेपालले असार १२ गतेसम्मका लागि विशेष सीमित अवधिका अफरहरू समेत सार्वजनिक गरेको छ। यसअन्तर्गत विस्तारित ब्याट्री वारेन्टी, शून्य प्रतिशतसम्म ब्याजदरमा फाइनान्सिङ सुविधा तथा एक्सचेन्ज गर्दा ८ हजार रुपैयाँसम्म अतिरिक्त मूल्याङ्कन लाभ उपलब्ध गराइने कम्पनीले जनाएको छ।

नेपाल स्वच्छ तथा दिगो यातायाततर्फ अग्रसर भइरहेका बेला एथर नेपालले बुद्धिमानीपूर्ण उत्पादन, सशक्त पूर्वाधार तथा ‘ग्राहक पहिलो’ अवधारणामार्फत विद्युतीय गतिशीलताको विस्तारमा नेतृत्वदायी भूमिका खेल्ने प्रतिबद्धता व्यक्त गरेको छ।