२४ जेठ, गोरखा- पूर्वयुवराज्ञी हिमानी शाह छोरा हृदयन्द्र र दुई छोरी पूर्णिमा तथा कृतिकाका साथ मंगलबार गोरखा पुग्नुभएको छ । मंगलबार बिहान १० बजे गोरखा पुग्नुभएकी शाह गोरखनाथ र गोरखकालीको पूजाअर्चनामा सरिक हुनुभएको गोरखनाथका पुजारी प्रदीपनाथ योगीले जानकारी दिनुभयो ।

करिब एक घन्टाको पूजाअर्चनापछि उहाँले गोरखा संग्राहलयको अवलोकन गर्नुभएको थियो । गोरखा संग्रहालयमा शाहवंशीय ऐतिहासिक सामग्री सुरक्षित छन् । संग्रहालयको अवलोकनपछि उहाँ गोरखा नगरपालिका कार्यालयमा पुगेर नवनिर्वाचित मेयर राजनराज पन्त, उपमेयर बिनाकुमारी श्रेष्ठ, कार्यकारी अधिकृत जीवन आलेलगायतका पदाधिकारी तथा कर्मचारीसँग भेटघाट गर्नुभएको थियो ।

उहाँले ऐतिहासिक स्थल गोरखाको पुरातात्विक तथा ऐतिहासिक सम्पदाको विकासका लागि हिमानी ट्रस्टमार्फत काम गर्ने बताउनुभएको मेयर पन्तले जानकारी दिनुभयो । ‘हामीले गोरखाको ऐतिहासिक, पुरातात्विक, पर्यटकीय महत्व र वर्तमान अवस्थाबारे जानकारी गरायौं’, उहाँले भन्नुभयो, ‘उहाँले गम्भीरताका साथ मनन गर्नुभयो र आफू सम्वद्ध हिमानी ट्रस्टमार्फत संरक्षण र विकासको काम गर्ने बताउनुभयो ।’

गणतन्त्र स्थापना भएपछि पूर्वराजपरिवारको यो पहिलो गोरखा भ्रमण हो । यसअघि पूर्वराजपरिवार नियमित गोरखा भ्रमणमा जाने र गोरखनाथ, गोरखकालीको दर्शन, पूजाअर्चना गर्ने गोरखनाथका पुजारी प्रदीपनाथ योगीले जानकारी दिनुभयो ।