काठमाडौं,२० भदौं । सुनसरीको धरान र इटहरीका दुई विद्यालयमा नेक्रबिक्रम चन्द विप्लव समुहले बम विष्फोट गराएको छ । धरान स्थित बीपी कोईराला स्वास्थ्य विज्ञान प्रतिष्ठानको हाता भित्र रहेको दिल्ली पव्लिक स्कुलको उत्तर तर्फको मुख्य गेटमा कुुकर बम विस्फोट गराएको छ ।

विष्फोटबाट विद्यालयको गेटमा सामान्य क्षति पुगेको छ । गएराति १२ बजे ठुलो आवाजका साथ विस्फोट भएको आसपासका बासिन्दाले बताएका छन् ।

बम विस्फोटको ठुलो आवाजले आसपासका भवनका झ्यालका सिसाहरु समेत फुटेका छन् । विहान घटना स्थल आसपासमा प्रहरीले खोज तलास गर्दा प्रेसर कुकरका केही टुक्राहरु फेला पारेको छ । धरानमा भएको घटनाको अनुसन्धान तथा खोजी तिब्र पारिएको इलाका प्रहरी कार्यालय धरानका प्रमुख डिएसपी ढुण्डीराज न्यौपानेले बताए ।

यसैगरी इटहरीको सुष्मा गोदावरी कलेजको गेटमा पनि बम विष्फोट गराएको हो । जिल्ला प्रहरी कार्यालय सुनसरीका डिएसपी तथा प्रवक्ता विनोद शर्माका अनुसार मध्यराती करिब साढे १२ बजेनै दुवै स्थानमा विष्फोट भएको हो ।

‘राती १२ बजेतिर एकै समयमा दुवै स्थानमा विष्फोट भएको थियो, ठुलो क्षति दुवै स्थानमा नभएको उनले बताए । ‘ठुलो क्षति केही छैन, तर्सासाउने नियतले विष्फोट गराएको हो,’डिएसपी शर्माले भने ।

उनका अनुसार विद्यालयहरुमा चन्दा माग गरेको तर नदिएपछि तर्साउने नियतले विष्फोट गराएको हो । घटनाबारे छानबिन शुरु गरिसकेको उनले बताए । ‘चन्दा नदिएपछि तर्साउनको लागि विष्फोट गराएको हो, छानबिन गर्दैछौं ।